New Update
തിരുവനന്തപുരം: വനിതാ മതിലിന് സര്ക്കാരിന്റെ പണം ഉപയോഗിക്കില്ലെന്ന് മുഖ്യമന്ത്രി പിണറായി വിജയന്. വനിതാ മതിലെന്ന ആശയത്തിന് സര്ക്കാര് പ്രചാരണം നല്കുമെന്നും മുഖ്യമന്ത്രി പറഞ്ഞു. മുഖ്യമന്ത്രിയുടെ ടെലിവിഷന് സംവാദ പരിപാടിയായ 'നാം മുന്നോട്ടി'ല് സംസാരിക്കുകയായിരുന്നു അദ്ദേഹം.
വനിതാ മതില് ഏതെങ്കിലും ഒരു പ്രത്യേക വിഭാഗത്തിന്റേതല്ല. ജാതിമത ഭേദമില്ലാതെ എല്ലാവരെയും സ്വാഗതം ചെയ്യും. ആചാരങ്ങളുടെ പേരില് ഈ മുന്നേറ്റം തടയാനാവില്ല. ആചാരങ്ങള് ലംഘിക്കാനുള്ളതാണെന്നാണ് കേരളത്തിലെ നവോത്ഥാന നായകര് പഠിപ്പിച്ചത്. അത് മറക്കരുത്. ശ്രീ നാരായണ ഗുരു അരുവിപ്പുറത്ത് പ്രതിഷ്ഠ നടത്തിയത് ഇങ്ങനെയൊരു ആചാര ലംഘനമായിരുന്നു. പാഠ്യപദ്ധതിയില് നവോത്ഥാന മൂല്യങ്ങള് ഉള്പ്പെടുത്തുന്നതിന് പ്രാമുഖ്യം നല്കുമെന്ന് മുഖ്യമന്ത്രി പറഞ്ഞു.
വനിതാ മതില് ഒരു സാമൂഹ്യ മുന്നേറ്റമാണ്. നവോത്ഥാന സംഘടനകള് തന്നെ സ്ത്രീകളെ കൊണ്ടുവരും. വനിതാ മതിലില് പങ്കെടുക്കുന്നതില് നിന്ന് സ്ത്രീകളെയും സാമൂഹ്യ സംഘടനകളെയും തടയാന് ശ്രമം നടക്കുന്നുണ്ട്. എന്നാല് ഈ നീക്കത്തെ തട്ടിമാറ്റി വലിയ മുന്നേറ്റം ഉണ്ടാവുമെന്നും മുഖ്യമന്ത്രി പറഞ്ഞു.