ന്യൂഡല്ഹി: പാര്ലമെന്റ് ഹൗസ് കോംപ്ലക്സില് പ്ലാസ്റ്റിക്കിനു വിലക്ക്. പുനരുപയോഗിക്കാന് കഴിയാത്ത പ്ലാസ്റ്റിക് കുപ്പികള്ക്കും മറ്റു പ്ലാസ്റ്റിക് ഉല്പ്പന്നങ്ങള്ക്കുമാണു ലോക്സഭാ സെക്രട്ടേറിയറ്റില് വിലക്കേര്പ്പെടുത്തിയത്. വിലക്ക് പ്രാബല്യത്തില് വന്നു.
എല്ലാ ഓഫീസര്മാരും സ്റ്റാഫ് അംഗങ്ങളും പാര്ലമന്റ് ഹൗസ് കോംപ്ലക്സില് പ്രവര്ത്തിക്കുന്ന ഓഫീസുകളും നിര്ദേശം അനുസരിക്കണമെന്നും പരിസ്ഥിതി സൗഹൃദ വസ്തുക്കള് ഉപയോഗിക്കാന് ശ്രദ്ധിക്കണമെന്നും ചൂണ്ടിക്കാട്ടി ലോക്സഭാ സെക്രട്ടേറിയറ്റ് ഉത്തരവ് പുറത്തിറക്കി. രാജ്യം പ്ലാസ്റ്റിക് വിമുക്തമാക്കുക എന്ന പ്രധാനമന്ത്രി നരേന്ദ്ര മോദിയുടെ ലക്ഷ്യം നടപ്പാക്കുന്നതിന്റെ ഭാഗമായാണ് ഈ തീരുമാനമെന്ന് ഉത്തരവില് പറയുന്നു.