തിരുവനന്തപുരം: ആത്മഹത്യ ചെയ്ത പ്രവാസി വ്യവസായി സാജന്റെ ഡയറി അന്വേഷണ സംഘത്തിന് കിട്ടി. നിര്ണ്ണായക വിവരങ്ങള് ഡയറിയില് ഉണ്ടെന്നാണ് സൂചന. നഗരസഭാ ഉദ്യോഗസ്ഥരുടെ പീഡനത്തെക്കുറിച്ചും, കണ്വെന്ഷന് സെന്ററിന്റെ നിര്മ്മാണ കാര്യങ്ങളും ഡയറിയിലുണ്ട്.
15 കോടി രൂപ മുതല് മുടക്കില് നിര്മ്മിച്ച ഓഡിറ്റോറിയത്തിന് പ്രവര്ത്തനാനുമതി നല്കാത്തതില് മനം നൊന്താണ് പ്രവാസി വ്യവസായിയായ കണ്ണൂര് കൊറ്റാളി സ്വദേശി സാജന് പാറയിൽ ആത്മഹത്യ ചെയ്തത്.
നൈജീരിയയില് ജോലി ചെയ്ത് മൂന്ന് വര്ഷം മുമ്പ് നാട്ടില് തിരിച്ചെത്തിയ ശേഷമാണ് കണ്ണൂര് ബക്കളത്ത് സാജൻ കൺവെൻഷൻ സെന്റർ നിർമ്മാണം തുടങ്ങിയത്. തുടക്കം മുതല് ഓഡിറ്റോറിയത്തിനെതിരെ നഗരസഭ പലവിധത്തിലുള്ള തടസങ്ങള് ഉന്നയിച്ചിരുന്നു.
ഒരു ഘട്ടത്തില് കെട്ടിടത്തിന്റെ ഒരു ഭാഗം പൊളിച്ച് നീക്കാന് പോലും നഗരസഭാ ഉദ്യോഗസ്ഥര് നിര്ദ്ദേശിച്ചിരുന്നു. ഇതില് മനം നൊന്താണ് പ്രവാസി ആത്മഹത്യ ചെയ്തതെന്നാണ് ബന്ധുക്കളുടെ ആരോപണം.