തിരുവനന്തപുരം: പോലീസ് സ്റ്റേഷനുകളിലും ബറ്റാലിയനുകളിലും ആഴ്ചയിലൊരിക്കല് നടത്തുന്ന പരേഡ് ഇനി മുതല് പൊതുസ്ഥലങ്ങളില് സംഘടിപ്പിക്കും. പോലീസിന്റെ ജനമൈത്രി പ്രവര്ത്തനങ്ങളിലേക്കു കൂടുതല് പേരെ ആകര്ഷിക്കുന്നതിന്റെ ഭാഗമായാണിതെന്നു സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു.
സ്വാതന്ത്ര്യദിന, റിപ്പബ്ലിക് ദിന പരേഡുകള് കൂടുതല് ജനങ്ങള്ക്ക് എത്താനും കാണാനും കഴിയുന്ന തരത്തില് ക്രമീകരിക്കാനും നിര്ദേശിച്ചിട്ടുണ്ട്.
കഴിഞ്ഞ റിപ്പബ്ലിക് ദിന പരേഡ് കോഴിക്കോട് ബീച്ച് റോഡില് നടത്തിയത് ഏറെപ്പേരെ ആകര്ഷിച്ചിരുന്നു. തിരുവനന്തപുരം സിറ്റി പോലീസിലേയും വിവിധ ജില്ലകളിലുള്ള എല്ലാ ബറ്റാലിയനുകളിലെയും പോലീസ് ബാന്റ് സംഘം ഇനിമുതല് ആഴ്ചയില് കുറഞ്ഞത് ഒരു ദിവസം പൊതുസ്ഥലത്തു ബാന്ഡ് വാദ്യം സംഘടിപ്പിക്കും. ഇതുവഴി കൂടുതല് കുട്ടികളും നാട്ടുകാരും ബാന്ഡ് മേളം കാണാന് എത്തുമെന്നാണു പ്രതീക്ഷ.