ചെന്നൈ: തമിഴര് നന്ദിയില്ലാത്തവരെന്നു തമിഴ്നാട്ടില്നിന്നുള്ള കേന്ദ്രമന്ത്രി പൊന് രാധാകൃഷ്ണന്. ആഭ്യന്തരമന്ത്രി അമിത് ഷായുടെ ഏകഭാഷാ വാദത്തിന്റെ ചുവടുപിടിച്ചായിരുന്നു കേന്ദ്രമന്ത്രിയുടെ പരാമര്ശം.
തമിഴിനെ രാജ്യത്തെ ഏറ്റവും പഴക്കമുള്ള ഭാഷകളില് ഒന്നായി പ്രഖ്യാപിച്ചതു പ്രധാനമന്ത്രി നരേന്ദ്ര മോദിയായിരുന്നു. സംസ്കൃതത്തേക്കാള് പുരാതന ഭാഷയാണു തമിഴ്. എന്തെങ്കിലും സ്നേഹം നമ്മുടെ ഭാഷയോടുണ്ടായിരുന്നുവെങ്കില്, നമ്മള് അത് ഒരു വര്ഷമെങ്കിലും ആഘോഷിച്ചേനെ. തമിഴര് നന്ദിയില്ലാത്തവരാണ് എന്നാണു പൊന് രാധാകൃഷ്ണന് ഒരു പരിപാടിക്കിടെ പറഞ്ഞത്.
ഹിന്ദി ഭാഷാ വാദത്തിനെതിരെ ദ്രാവിഡ പാര്ട്ടികള് ഒറ്റക്കെട്ടായി രംഗത്തുവന്നതിനിടെയാണു പൊന് രാധാകൃഷ്ണന്റെ പരാമര്ശം. കേന്ദ്രമന്ത്രിക്കെതിരേ വന്രോഷമാണ് തമിഴ്നാട്ടില് ഉയരുന്നത്. പൊന് രാധാകൃഷ്ണന് മാപ്പു പറയണമെന്നു കോണ്ഗ്രസ് ആവശ്യപ്പെട്ടു. അടുത്ത ദിവസം പ്രതിഷേധ പരിപാടിയില് പൊന് രാധാകൃഷ്ണനു മറുപടി നല്കുമെന്നു ഡിഎംകെ അധ്യക്ഷന് എം.കെ. സ്റ്റാലിനും പറഞ്ഞു.
നേരത്തെ, രാജ്യത്തെ ഒരുമിപ്പിക്കാന് ഹിന്ദി ഭാഷയ്ക്കാണു കഴിയുകയെന്ന അമിത് ഷായുടെ പരാമര്ശമാണു വിവാദമായത്. പിന്നാലെ, ഒരു രാജ്യം ഒരു ഭാഷ എന്ന അമിത് ഷായുടെ നീക്കത്തിനെതിരേ വ്യാപക പ്രതിഷേധം ഉയര്ന്നു. ഹിന്ദി അടിച്ചേല്പിക്കാനുള്ള നീക്കത്തില് പ്രതിഷേധിച്ചു ദക്ഷിണേന്ത്യയില് വിവിധ സംഘടനകള് തെരുവിലിറങ്ങി.
സാന്പത്തിക മുരടിപ്പ് അടക്കമുള്ള പ്രശ്നങ്ങളില് നിന്നു ശ്രദ്ധതിരിക്കാനാണു ഹിന്ദി അടിച്ചേല്പിക്കാന് വീണ്ടും ശ്രമം നടത്തുന്നതെന്നു കോണ്ഗ്രസ്, ഡിഎംകെ, അണ്ണാ ഡിഎംകെ, തൃണമൂല്, സിപിഎം, സിപിഐ തുടങ്ങിയ പാര്ട്ടികള് ആരോപിച്ചു.