ദുബായ്: ദുബായില് നടക്കുന്ന എ കെ സി സിയുടെ പ്രഥമ ആഗോള സംഗമത്തില് സജീവ സാന്നിധ്യമായി കുവൈറ്റ് എസ് എം സി എയും. കത്തോലിക്കാ കോൺഗ്രസ് ഗ്ലോബൽ സമ്മേളനത്തിൽ ചലഞ്ചസ് ഒഫ് മൈഗ്രന്റ് കമ്മ്യൂണിറ്റി എന്ന വിഷയത്തെ കുറിച്ചുള്ള ചര്ച്ചയില് വേദി കയ്യടക്കിയത് കുവൈറ്റ് എസ് എം സി എ പ്രതിനിധികളായിരുന്നു. പ്രസിഡന്റ് തോമസ് കുരുവിള നരിതൂക്കിലാണ് സെക്ഷനില് അധ്യക്ഷത വഹിച്ചത്.
എ കെ സി സി ഗ്ലോബൽ വർക്കിംങ്ങ് കമ്മറ്റി അംഗവും കുവൈറ്റ് എസ് എം സി എ പ്രതിനിധിയുമായ സുനിൽ പി. ആന്റണിയാണ് സ്വാഗതം ആശംസിച്ചത്. മെല്ബണ് രൂപതാ മെത്രാൻ മാർ ബോസ്ക്കോ പുത്തൂർ സമ്മേളനം ഉദ്ഘാടനം ചെയ്തു. തുടർന്ന് ഷംഷാബാദ് രൂപത മെത്രാൻ മാർ റാഫേൽ തട്ടിൽ വിഷയാവതരണം നടത്തി.
കത്തോലിക്കാ കോൺഗ്രസ് ഗ്ലോബൽ വൈസ് പ്രസിഡണ്ട് അഡ്വ.പി.ടി. ചാക്കോ ഗുജറാത്ത്, ദുബായ് എസ്.എം സി എ പ്രസിഡണ്ട് വിപിൻ വർഗ്ഗീസ്, കല്യാൺ രൂപത വികാരി ജനറാൽ മോൺ. ഇമ്മാനുവേൽ കാടൻകവിൽ, കുവൈറ്റ് എസ്.എം.സി.എ പ്രസിഡണ്ട് തോമസ് കുരുവിള, ജോയ് ആന്റണി ഖത്തർ, പ്രവാസി കോ-ഓർഡിനേറ്റർ സിബി വാണിയപുരയ്ക്കൽ, റീയാദ് സി.എം സി എ പ്രസിഡണ്ട് ബിനോയ് ജോസഫ് പടപ്പു, ഗ്ലോബൽ സെക്രട്ടറി ആന്റണി എൽ തൊമ്മാന എന്നിവർ വിഷയാവതരണത്തിൽ സഹ പങ്കാളികളായി.
സീറോ മലബാര് സഭയുടെ ആദ്യ എസ് എം സി എ രൂപീകൃതമായത് കുവൈറ്റിലായിരുന്നു. കുവൈറ്റ് എസ് എം സി എ രൂപീകൃതമായിട്ട് 25 വര്ഷങ്ങള് പൂര്ത്തിയാകുകയാണ്. ഇരുപത്തിയയ്യായിരത്തില്പ്പരം അംഗങ്ങള് ഉള്ള സംഘടനയാണ് കുവൈറ്റ് എസ് എം സി എ. സംഘടനയുടെ ആഭിമുഖ്യത്തില് ഇതിനോടകം നൂറുകണക്കിന് വീടുകള് നിര്മ്മിച്ചു നല്കിയിട്ടുണ്ട്.
ജീവകാരുണ്യ പ്രവര്ത്തന രംഗത്ത് കോടിക്കണക്കിനു രൂപയുടെ സംഭാവനകളാണ് കുവൈറ്റ് എസ് എം സി എ നിര്വഹിച്ചിട്ടുള്ളത്. സംഘടന രൂപീകരണത്തിന്റെ ജൂബിലി പിന്നിടുമ്പോള് കത്തോലിക്കാ സഭയുടെ ഏറ്റവും പ്രധാനമായ എ കെ സി സിയുടെ ആഗോള സമ്മേളനത്തില് നിറസാന്നിധ്യമാകാന് സാധിച്ചുവെന്നത് അഭിമാന മുഹൂര്ത്തമാണ്.