മാധ്യമ പ്രവർത്തകൻ പി എ എം ഹാരിസ് രചിച്ച "വിശ്വപൗരൻ - മമ്പുറം ഫസൽ തങ്ങൾ" പ്രകാശനം ഡോ. ഹുസൈൻ രണ്ടത്താണി നിർവഹിച്ചു;  "ചരിത്രത്തെ തമസ്കരിച്ചു കൊണ്ടിരിക്കുമ്പോൾ അതിനെ വീണ്ടെടുക്കാനുള്ള ശ്രമം മഹനീയം"

ദമ്മാം:   മുതിർന്ന മാധ്യമ പ്രവർത്തകൻ പി എ എം ഹാരിസ് രചിച്ച "വിശ്വപൗരൻ - മമ്പുറം ഫസൽ തങ്ങൾ"  പ്രശസ്ത ചരിത്രകാരനും എഴുത്തുകാരനും സാമൂഹ്യ പ്രവർത്തകനുമായ ഡോ.ഹുസൈൻ രണ്ടത്താണി സൗദിയിലെ ദമ്മാമിൽ നിർവഹിച്ചു.  

ഡോ.സിദ്ധീഖ് അഹമ്മദ്  ആദ്യപ്രതി ഏറ്റുവാങ്ങി. ചരിത്രത്തെ തമസ്‌കരിക്കുകയെന്നത്  തലമുറകളോടും കാലത്തോടും ചെയ്യുന്ന അനീതിയാണെന്നും അതിന്റെ വീണ്ടെടുപ്പിനായി പണിയെടുക്കുന്നവർ കാലാതിവർത്തികലാണെന്നും പുസ്തകം പ്രകാശനം നിർവഹിച്ച് കൊണ്ട് ഡോ. രണ്ടത്താണി പറഞ്ഞു.    

ഇന്ത്യയുടെ സ്വാതന്ത്ര്യ സമര ചരിത്രത്തിൽ ഏറ്റവും ഉജ്വലവും രണോത്സുകവുമായ അധ്യായങ്ങളിൽ ഒന്നാണ് മലബാറിലെ ഖിലാഫത്ത് സമരം.  ബ്രിട്ടീഷ് അധിനിവേശ അധികാരികൾക്കും അവരോട് കൈകോർത്തു നിന്ന ജന്മിത്വത്തിനും മലബാറിലെ ധീര ദേശാഭിമാനികൾ പ്രതിരോധത്തിന്റെ മാരക പ്രഹരങ്ങളാണ് അഴിച്ചു വിട്ടത്.

അതിന് നേതൃപരമായ പങ്കാണ് മമ്പുറം തങ്ങന്മാർ നിർവഹിച്ചു പോന്നത്. "ആത്മീയതയിൽ മാത്രമല്ല, സാമൂഹ്യ രാഷ്ട്രീയ നവോത്ഥാന രംഗത്തും മമ്പുറം സയ്യിദ് കുടുംബത്തിലെ അനുപമ വ്യക്തിത്വങ്ങൾ പ്രോജ്വലിച്ചു നിൽക്കുകയായിരുന്നു.  

അതുകൊണ്ടാണ് ഖിലാഫത്ത് സമരത്തിന് നൂറ് വർഷം കഴിഞ്ഞിട്ടും കാലത്തിന് മങ്ങലേൽപിക്കാൻ കഴിയാതെ ഇന്ത്യൻ സ്വാതന്ത്ര്യ ചരിത്രത്തിൽ ആവേശകരമായ ഓർമ്മയായി അത് നിറയുന്നത്":  ഡോ.ഹുസൈൻ രണ്ടത്താണി  തുടർന്നു.

മൺമറഞ്ഞ സാമൂഹിക പ്രതിബദ്ധതയുള്ള നവോത്ഥാന  നേതാക്കൾ നടത്തിയ പോരാട്ടങ്ങളുടെ ചരിത്രം, ചരിത്രത്തിലെ തന്നെ നാഴികക്കല്ലുകളായി മാറിയ സമരങ്ങൾ, ചെറുത്ത് നിൽപുകൾ എന്നിവയെ കുറിച്ചുള്ള അവബോധം സൃഷിടിക്കുന്നതിന് മുന്തിയ പരിഗണന നൽകുന്നുണ്ടെന്നും ഈ രംഗത്ത് സമഗ്ര സംഭാവന നൽകാനുതകുന്ന ഒരു സംരംഭത്തിന്റെ അവസാന മിനുക്കു പണികൾ താനടങ്ങുന്ന സമിതിയുടെ നേതൃത്വത്തിൽ പൂർത്തീകരിച്ചു വരികയാണെന്നും ഡോ.ഹുസൈൻ രണ്ടത്താണി  അറിയിച്ചു.

മലബാർ കൗൺസിൽ ഓഫ് ഹെറിറ്റേജ്, കൾച്ചറൽ സ്റ്റഡീസിന്റെ ദമാം ചാപ്റ്റർ ആയിരുന്നു  പുസ്തകപ്രകാശന  ചടങ്ങിന്റെ  സംഘാടകർ. സാജിദ് ആറാട്ടുപുഴ പുസ്തകം പരിചയപ്പെടുത്തി.  ദമ്മാം ദാർസിഹ ഓഡിറ്റോറിയത്തിൽ നടന്ന ചടങ്ങിൽ പ്രോഗ്രാം ചെയർമാൻ മാലിക് മഖ്ബൂൽ അധ്യക്ഷത വഹിച്ചു. 

ടി പി എം ഫസൽ, മൻസൂർ പള്ളൂർ, മജീദ് കൊടുവള്ളി, പ്രദീപ് കൊട്ടിയം സംസാരിച്ചു.  ഗ്രന്ഥകർത്താവ് പി എ എം ഹാരിസ് മറുപടിപ്രസംഗം നടത്തി. 

ഡോ സിന്ധു അവതാരകയായിരുന്നു.  കല്യാണി ബിനു ആലപിച്ച പ്രാർഥനാ ഗാനതോടെയായിരുന്നു  പരിപാടിയുടെ തുടക്കം.   പി ടി അലവി സ്വാഗതവും അഷ്റഫ് ആളത്ത് നന്ദിയും പറഞ്ഞു.    നജീം ബഷീർ, നാച്ചു അണ്ടോണ, സി പി ശരീഫ്, മുഹ്‌സിൻ മുഹമ്മദ്, ഖിദ്ർ മുഹമ്മദ്, ഒ പി ഹബീബ്, അഷ്ഫാഖ് ഹാരിസ്, ഷബീർ ചാത്തമംഗലം, കരീം വേങ്ങര എന്നിവർ നേതൃത്വം നൽകി.