ഡൽഹി: ജമ്മു കാഷ്മീർ വിഷയത്തിൽ കേന്ദ്ര സർക്കാരിനെതിരേ രൂക്ഷ വിമർശനവുമായി എഐസിസി ജനറൽ സെക്രട്ടറി പ്രിയങ്ക ഗാന്ധി. ദേശീയതയുടെ പേരിൽ കാഷ്മീരിലെ ജനങ്ങൾക്കുള്ള ജനാധിപത്യ അവകാശങ്ങൾ സര്ക്കാര് അടിച്ചമർത്തുകയാണെന്ന് പ്രിയങ്ക വിമർശിച്ചു.
കഴിഞ്ഞ ദിവസം രാഹുൽ ഗാന്ധി അടക്കമുള്ള പ്രതിപക്ഷ നേതാക്കൾ ശ്രീനഗറിലേക്ക് സഞ്ചരിച്ച വിമാനത്തിൽ യാത്ര ചെയ്ത കാഷ്മീരുകാരിയായ സ്ത്രീ രാഹുൽ ഗാന്ധിക്കു മുന്പിൽ പരാതി പറയുന്ന വീഡിയോ ട്വീറ്റ് ചെയ്താണ് സർക്കാരിനെതിരായ പ്രിയങ്കയുടെ വിമർശനം.
കാഷ്മീരിലെ ജനാധിപത്യ അവകാശങ്ങൾ ലംഘിക്കപ്പെടുന്നത്ര ദേശവിരുദ്ധതയും രാഷ്ട്രീയവും മറ്റൊന്നിലുമില്ല. ഇതിനെതിരേ ശബ്ദമുയർത്തേണ്ടത് നമ്മൾ ഓരോരുത്തരുടെയും കടമയാണ്. ഇക്കാര്യം ഉന്നയിക്കുന്നതിൽനിന്ന് പിന്നോട്ടില്ലെന്നും പ്രിയങ്ക വ്യക്തമാക്കി.