വാതക പൈപ്പ് ലൈന് പൊട്ടിത്തെറിക്കുമെന്ന് പ്രചരിപ്പിച്ച് നാടിനെ ഭയാശങ്കയിലാക്കി പ്രക്ഷോഭം നടത്തിയവരാണ് ഇപ്പോള് തങ്ങളുടെ ഏറ്റവും അഭിമാനകരമായ നേട്ടമായി ഗെയില് പദ്ധതിയെ കൊണ്ടാടുന്നതെന്ന് പരിഹസിച്ച് മുന് മുഖ്യമന്ത്രി ഉമ്മന്ചാണ്ടിയുടെ പ്രസ് സെക്രട്ടറിയായിരുന്ന പിടി തോമസ് രംഗത്ത്. ഫെയ്സ്ബുക്ക് കുറിപ്പിലൂടെയാണ് വിമര്ശനം.
കുറിപ്പ് ഇങ്ങനെ
ഗെയില് ഗെയില് ഗോ എവേ...
ഗെയില് പദ്ധതി ഉദ്ഘാടനത്തോട് അനുബന്ധിച്ച് മോഡി സര്ക്കാരിന്റെ അര പേജ് പരസ്യവും പിണറായി സര്ക്കാരിന്റെ അരപേജ് പരസ്യവും കണ്ടപ്പോള് മനംകുളിര്ത്തു. പദ്ധതി ഇപ്പോഴെങ്കിലും നടപ്പായല്ലോ!
എത്രയോ മുമ്പേ നടപ്പാക്കേണ്ട പദ്ധതിയായിരുന്നു. വാതക പൈപ്പ് ലൈന് പൊട്ടിത്തെറിക്കുമെന്ന് പ്രചരിപ്പിച്ച് നാടിനെ ഭയാശങ്കയിലാക്കി പ്രക്ഷോഭം നടത്തിയവരാണ് ഇപ്പോള് തങ്ങളുടെ ഏറ്റവും അഭിമാനകരമായ നേട്ടമായി ഗെയില് പദ്ധതിയെ കൊണ്ടാടുന്നത്.
യുഡിഎഫ് ഭരണകാലത്ത് സിപിഎം ഇതിനെതിരേ നടത്തിയ വ്യാപകമായ പ്രചാരണവും പ്രക്ഷോഭവും അവര് മറന്നു. 'ഗെയില് വാതക പൈപ്പ് ലൈനിനെതിരേ സിപിഎം പ്രക്ഷോഭത്തിലേക്ക് ' എന്ന തലക്കെട്ടോടെ ഇറങ്ങിയ നോട്ടീസില് നാടിന്റെ പൂര്ണ രക്ഷയ്ക്കായി സിപിഎം പ്രതിരോധ സമരം തുടങ്ങുകയാണെന്നു പറയുന്നു. 'ഗെയില് ഗെയില് ഗോ എവേ' എന്നായിരുന്നു മുദ്രാവാക്യം.
സിപിഎമ്മിന്റെയും അവരോടൊപ്പം ചേര്ന്ന ചില സംഘടനകളുടെയും ശക്തമായ എതിര്പ്പിനെ മറികടന്നും ഗെയില് വാതക പൈപ്പ് ലൈനിന് ആവശ്യമായ സ്ഥലം ഉപയോഗിക്കാന് 90 ശതമാനം പേരില് നിന്നും യുഡിഎഫ് അനുമതി നേടിയിരുന്നു.
28 സ്റ്റേഷനുകള്ക്ക് സ്ഥലമെടുപ്പ് വേണ്ടിയിരുന്നതില് 15 ഉം യുഡിഎഫ് പൂര്ത്തിയാക്കി.
യുഡിഎഫ് പദ്ധതി ലക്ഷ്യത്തിലെത്തിക്കുമെന്നു വ്യക്തമായപ്പോഴാണ് സിപിഎം വ്യാജപ്രചാരണവും പ്രക്ഷോഭവുമായി രംഗത്തിറങ്ങിയത്.
ഗെയില് പദ്ധതി വൈകിപ്പിച്ചതിന് മാപ്പുപറഞ്ഞിട്ടുവേണം ഇടതുപക്ഷം സ്വയം അഭിമാനിക്കാന്.
ഗെയില് ഗെയില് ഗോ എവേ..