എരുമേലി: പൂഞ്ഞാറിൽ യുഡിഎഫിന്റെ വിജയ പ്രതീക്ഷക്ക് കരുത്തായി നാളെ രാഹുൽ തരംഗം. മുൻ എഐസിസി അധ്യക്ഷൻ കൂടിയായ രാഹുൽ ഗാന്ധി ഇതാദ്യമായി എരുമേലിയിലും എത്തുന്നു. ശബരിമല തീർത്ഥാടന കേന്ദ്രവും മത സൗഹാർദ്ദത്തിന് ലോകമെങ്ങും മാതൃകയുമായ എരുമേലിയിൽ നാളെ ഉച്ചക്ക് എത്തുന്ന രാഹുൽ ഗാന്ധി ശ്രീ ധർമ്മ ശാസ്താ ക്ഷേത്രങ്ങളും നൈനാർ മസ്ജിദും സന്ദർശിക്കും.
പേട്ടക്കവലയിൽ പൊതുജനങ്ങളോട് സംസാരിക്കും. തുടർന്ന് ഹെലികോപ്റ്ററിൽ ഇടുക്കി ജില്ലയിൽ പര്യടനത്തിനായി പീരുമേട്ടിലെത്തും. നാളെ 27 ശനിയാഴ്ച രാവിലെ 11 ന് പത്തനംതിട്ട ജില്ലയിലെ കോന്നി നിയമസഭാ മണ്ഡലത്തിലാണ് രാഹുൽ ഗാന്ധിയുടെ പ്രചാരണത്തിന് തുടക്കമാവുക.
രാവിലെ 11.20ന് പ്രമാടം രാജീവ്ഗാന്ധി ഇൻഡോർ സ്റ്റേഡിയത്തിൽ ഹെലികോപ്ടർ ഇറങ്ങുന്ന അദ്ദേഹം കോന്നി നിയോജകമണ്ഡലം സ്ഥാനാർഥി റോബിൻ പീറ്റർക്കൊപ്പം റോഡ്ഷോയിൽ പങ്കെടുക്കും. പ്രമാടത്തുനിന്ന് കോന്നി ടൗണിലേക്കാണ് ആദ്യ യാത്ര. കോന്നി ടൗണിൽ റോഡ്ഷോയിൽ പങ്കെടുത്തുകൊണ്ടുതന്നെ പ്രസംഗിക്കും. വെട്ടൂർ വഴി കുമ്പഴയിലേക്കാണ് പിന്നീടുള്ള യാത്ര.
കുമ്പഴയിൽ ആറന്മുള മണ്ഡലത്തിലെ പര്യടനം ആരംഭിക്കും. സ്ഥാനാർഥി കെ. ശിവദാസൻ നായർക്കൊപ്പം റോഡ്ഷോ പത്തനംതിട്ട ടൗണിലേക്കു നീങ്ങും. ടൗണിൽ പൊതുസമൂഹത്തെ അഭിസംബോധന ചെയ്യും. തുടർന്ന് സെന്റ് പീറ്റേഴ്സ് സ്ക്വയറിലെത്തി റാന്നി മണ്ഡലത്തിലേക്കു യാത്ര തിരിക്കും. മൈലപ്ര, ഉതിമൂട്, ബ്ലോക്ക് പടി വഴി റാന്നി പെരുമ്പുഴയിലെത്തും. പെരുമ്പുഴയിൽ നിന്നും സ്ഥാനാർഥി റിങ്കു ചെറിയാനോടൊപ്പം റോഡ്ഷോയായി ഇട്ടിയപ്പാറയിലേക്കു നീങ്ങും. ഇട്ടിയപ്പാറയിൽ പ്രസംഗത്തിനുശേഷം മന്ദമരുതി വഴി പ്ലാച്ചേരി വരെ ഡിസിസി നേതാക്കളും സ്ഥാനാർഥിയും അനുഗമിക്കും.
കോന്നിയിൽ നിന്ന് ആരംഭിക്കുന്ന റോഡ് ഷോ ഉച്ചക്ക് ഒന്നിന് എരുമേലിയിൽ എത്തുമെന്ന് ആന്റോ ആന്റണി എം പി അറിയിച്ചു. എരുമേലി ശ്രീ ധർമ്മശാസ്താ ക്ഷേത്രത്തിന് മുന്നിൽ നേതാക്കളും പ്രവർത്തകരും ചേർന്ന് സ്വീകരിക്കും. തുടർന്ന് ക്ഷേത്രത്തിൽ കയറി ദർശനം നടത്തും. പേട്ടക്കവലയിൽ എത്തുമ്പോൾ കൊച്ചമ്പലം, നൈനാർ മസ്ജിദ് എന്നിവിടങ്ങളിൽ സന്ദർശനം നടത്തും. തുറന്ന വാഹനത്തിൽ നിന്ന് പേട്ടക്കവലയിൽ വെച്ച് ജനങ്ങളോട് സംസാരിക്കും.
തുടർന്ന് ഹെലികോപ്റ്ററിൽ ഇടുക്കി ജില്ലയിലേക്ക് പര്യടനത്തിനായി പോകും. വിപുലമായ ഒരുക്കങ്ങളാണ് രാഹുൽ ഗാന്ധിയെ സ്വീകരിക്കാൻ എരുമേലിയിൽ ക്രമീകരിച്ചിരിക്കുന്നതെന്ന് കെപിസിസി സെക്രട്ടറി അഡ്വ. പി എ സലീം അറിയിച്ചു. പൂഞ്ഞാർ മണ്ഡലം യുഡിഎഫ് സ്ഥാനാർത്ഥി അഡ്വ. ടോമി കല്ലാനി രാഹുൽ ഗാന്ധിക്കൊപ്പം തുറന്ന വാഹനത്തിൽ റോഡ് ഷോയിൽ പങ്കെടുക്കും. വൻ സുരക്ഷാ ക്രമീകരണങ്ങളാണ് രാഹുൽ ഗാന്ധിയുടെ സന്ദർശനവുമായി ബന്ധപ്പെട്ട് എരുമേലിയിൽ പോലിസ് ഏർപ്പെടുത്തിയിരിക്കുന്നത്. ഗതാഗത തടസമുണ്ടാകാതിരിക്കാൻ ക്രമീകരണങ്ങൾ ഏർപ്പെടുത്തുമെന്ന് പോലിസ് പറഞ്ഞു.
പേട്ടക്കവല ഒഴിവാക്കി കടന്നുപോകാവുന്ന റോഡുകൾ വഴിയാണ് ഗതാഗതം ക്രമീകരിക്കുക. പൂഞ്ഞാർ മണ്ഡലത്തിൽ നിന്നും നൂറുകണക്കിന് പ്രവർത്തകർ നാളെ എരുമേലിയിൽ എത്തുന്നുണ്ട്. പൂഞ്ഞാറിന്റെ വികസന വിഷയങ്ങളും എരുമേലിയുടെ ദേശീയ പ്രാധാന്യം നിറഞ്ഞ പ്രത്യേകതയും ശബരിമല വിഷയവും ഉൾപ്പെടെ രാഹുൽ ഗാന്ധിയുടെ പ്രസംഗത്തിലുണ്ടാകുമെന്ന് നേതാക്കൾ പറഞ്ഞു.
ഏപ്രിൽ ആദ്യവാരം സംസ്ഥാനത്തെത്തുന്ന പ്രിയങ്കാഗാന്ധിയെ പങ്കെടുപ്പിച്ച് പ്രചാരണ പരിപാടികൾ ആലോചിച്ചുവരികയാണെന്ന് ആന്റോ ആന്റണി എംപി പറഞ്ഞു. പത്തനംതിട്ട ലോക്സഭ മണ്ഡലപരിധിയിൽ കാഞ്ഞിരപ്പള്ളി, പൂഞ്ഞാറും പത്തനംതിട്ട ജില്ലയിലെ അഞ്ച് മണ്ഡലങ്ങളും ഇത്തവണ യുഡിഎഫിന് അനുകൂലമായ വിധിയെഴുത്ത് ഉണ്ടാകുമെന്ന് അദ്ദേഹം അഭിപ്രായപ്പെട്ടു.