ന്യൂഡല്ഹി: റെയ്സിനാ റോഡില് കുഴഞ്ഞുവീണ കുരങ്ങിനെ രക്ഷിക്കാന് ആംബുലന്സയച്ച് ബിജെപി നേതാവ് മേനകാ ഗാന്ധി. മാധ്യമ പ്രവര്ത്തക ട്വിറ്ററിലൂടെ ഇട്ട സന്ദേശത്തില് നിന്നു വിവരമറിഞ്ഞാണ് മുന് കേന്ദ്രമന്ത്രിയും മൃഗ സംരക്ഷക പ്രവര്ത്തകയുമായ മേനക ഗാന്ധിയുടെ അടിയന്തര നടപടി. കുരങ്ങിനു കൈത്താങ്ങായ മേനക ഗാന്ധിയുടെ നടപടി ഇപ്പോള് സമൂഹ മാധ്യമങ്ങളില് വൈറലായിട്ടുണ്ട്.
രാവിലെ ഡല്ഹിയിലെ പ്രസ് ക്ലബ് ഓഫ് ഇന്ത്യയുടെ പരിസരത്ത് റോഡിനരികില് അവശനിലയിലായ കുരങ്ങിനെ കണ്ടെത്തിയത്. ഇതു മാധ്യമ പ്രവര്ത്തകയായ ഭാരതി ജെയിന് ചിത്രത്തോടൊപ്പം ട്വിറ്ററില് പോസ്റ്റ് ചെയ്തു. ഏതെങ്കിലും മൃഗസംരക്ഷക പ്രവര്ത്തകരോ എന്ജിഒയോ കുരങ്ങിനെ രക്ഷിക്കണമെന്ന് ആവശ്യപ്പെട്ട സന്ദേശത്തില് മേനക ഗാന്ധിയെ ടാഗ് ചെയ്യുകയും ചെയ്തിരുന്നു.
തൊട്ടുപിന്നാലെ തന്നെ മേനകയുടെ റിട്വീറ്റും എത്തി. ഒരു വാഹനം അയയ്ക്കുന്നുണ്ടെന്നും അതില് കുരങ്ങനെ സഞ്ജയ് ഗാന്ധി ആനിമല് കെയറില് എത്തിക്കുമെന്നും മേനക അറിയിച്ചു.