കൊച്ചി: നടന് ഷെയ്ന് നിഗമിന് മലയാള സിനിമാ നിര്മാതാക്കളുടെ വിലക്ക്. ഷെയ്നിനെ പുതിയ ചിത്രങ്ങളില് സഹകരിപ്പിക്കേണ്ടെന്നു പ്രൊഡ്യൂസേഴ്സ് അസോസിയേഷന്റെ അടിയന്തര യോഗം തീരുമാനിച്ചു. വെയില് എന്ന ചിത്രത്തിന്റെ ഷൂട്ടിംഗ് കരാര് ലംഘിച്ചെന്നു കാട്ടിയാണു നടപടി.
നിര്മാതാവ് ജോബി ജോര്ജാണു ഷെയ്ന് നിഗമിനെതിരെ പ്രൊഡ്യൂസേഴ്സ് അസോസിയേഷനില് വീണ്ടും പരാതി നല്കിയത്. വെയില് എന്ന സിനിമയുമായി സഹകരിക്കാന് ഷെയ്ന് നിഗം തയാറാവുന്നില്ലെന്നാണു പരാതി.
നേരത്തെ, വെയില് സിനിമയുടെ നിര്മാതാവ് ജോബി ജോര്ജ് തന്നെ കൊല്ലുമെന്നു ഭീഷണിപ്പെടുത്തിയെന്ന ആരോപണവുമായി ഷെയ്ന് നിഗം രംഗത്തെത്തിയിരുന്നു. താരസംഘടനയായ അമ്മയ്ക്കു പരാതി നല്കുകയും ചെയ്തു.
ഇതേതുടര്ന്ന് ഇരുവരും തമ്മിലുള്ള തര്ക്കം സംഘടനകള് ഇടപെട്ട് പരിഹരിച്ചു. വെയില് സിനിമയുടെ ചിത്രീകരണത്തിനായി വരാമെന്ന് ഷെയ്ന് സമ്മതിക്കുകയും ചെയ്തു. എന്നാല് ഒത്തുതീര്പ്പ് വ്യവസ്ഥകള് ലംഘിച്ചുകൊണ്ട് ഷെയ്ന് ഷൂട്ടിംഗിന് എത്തുന്നില്ലെന്നാണ് ജോബി ജോര്ജ് പരാതിയില് ഉന്നയിക്കുന്നത്.