മുംബൈ: നിയമസഭാ തെരഞ്ഞെടുപ്പ് അടുത്തിരിക്കെ മഹാരാഷ്ട്രയില് 50 ശിവസേനാ നേതാക്കള് സിപിഎമ്മില് ചേര്ന്നു. പാല്ഘര് ജില്ലയിലെ ദഹാനു തെഹ്സിലിലെ അംബേസരി, നഗാസരി ഗ്രാമങ്ങളിലെ ആദിവാസി യുവ നേതാക്കളാണു സിപിഎമ്മില് ചേര്ന്നത്.
ശിവസേനയില്നിന്ന് എത്തുന്ന നേതാക്കളെ സ്വീകരിക്കാന് സിപിഎം വന് പൊതുയോഗം സംഘടിപ്പിച്ചിരുന്നു. ശിവസേന വിട്ട നേതാക്കള് സിപിഎമ്മിന്റെ സ്ഥാനാര്ഥി വിനോദ് നികോലിനു വേണ്ടി പ്രവര്ത്തിക്കും.
ആദിവാസി സംവരണ മണ്ഡലമായ ദഹാനുവില്നിന്നാണു നികോല് ജനവിധി തേടുന്നത്. സിപിഎം പ്രതീക്ഷ വയ്ക്കുന്ന മണ്ഡലമാണിത്. എന്സിപി, കോണ്ഗ്രസ്, ബഹുജന് വികാസ് അകാലിദള് തുടങ്ങിയ സംഘടനകള് വിനോദിനു പിന്തുണ പ്രഖ്യാപിച്ചിട്ടുണ്ട്. 1978, 2009 തെരഞ്ഞെടുപ്പുകളില് സിപിഎം ജയിച്ച മണ്ഡലമാണു ദഹാനു.