ഒമാനിൽ മലയാളിയുടെ ഉടമസ്ഥതയിലുള്ള ഷോപ്പിങ് സെന്റർ കത്തി നശിച്ചു

മസ്കത്ത്: സുവൈഖിൽ മലയാളിയുടെ ഉടമസ്ഥതയിലുള്ള ഷോപ്പിങ് സെന്റർ കത്തി നശിച്ചു. സുവൈഖ് ബലദിയ പാർക്കിനു സമീപമുള്ള ജുനൂബ് അൽ മദീന ഷോപ്പിങ് സെന്ററാണ് കത്തി നശിച്ചത്. എടപ്പാൾ സ്വദേശി ഇസ്മയിലിന്റെ ഉടമസ്ഥതയിലുള്ള സ്ഥാപനമാണ് കത്തിനശിച്ചത്. വ്യാഴാഴ്ച വൈകിട്ട് മൂന്നോടെയാണ് ഷോപ്പിങ് സെന്ററിൽ തീപിടുത്തമുണ്ടായത്.

രണ്ട് നിലകളുള്ള ഷോപ്പിങ് സെന്ററിന്റെ മുകൾ നിലയിലാണ് തീപിടുത്തം ഉണ്ടായതെന്ന് കരുതുന്നു. കടയിലെത്തിയ ഉപഭോക്താക്കളും ജീവനക്കാരും ഉടൻതന്നെ പുറത്തിറങ്ങിയതിനാൽ വലിയ അപകടം ഒഴിവായി. ഷോപ്പിങ് സെന്ററിനോടു ചേർന്നുള്ള സ്റ്റോറും കത്തി നശിച്ചിട്ടുണ്ട്.

മറ്റൊരു സ്റ്റോറിലേക്കും തൊഴിലാളികളുടെ വാസ സ്ഥലത്തേക്കും തീ പടരുന്നതിനു മുമ്പു തന്നെ അഗ്നിബാധ നിയന്ത്രണവിധേയമാക്കി. ഒന്നിലധികം ഫയർഫോഴ്സ് യൂണിറ്റ് സ്ഥലത്തെത്തിയാണ് തീ നിയന്ത്രണവിധേയമാക്കിയത്. ഷോപ്പിങ് സെന്ററിന് സമീപത്തുള്ള ഫ്ലാറ്റുകളിൽനിന്നും സുരക്ഷ മുൻനിർത്തി താമസക്കാരെ ഒഴിപ്പിച്ചിരുന്നു.