ഇന്ത്യയില്‍ നിന്ന് 'കടലിലൂടെ' കൊവിഡ് വരുമോയെന്ന് പേടിച്ച് ശ്രീലങ്ക; പട്രോളിംഗ് ശക്തമാക്കി ലങ്കന്‍ നേവി, തയ്യാറായിരിക്കാന്‍ വ്യോമസേനക്കും നിര്‍ദ്ദേശം

കൊളംബോ: ഇന്ത്യന്‍ മീന്‍പിടുത്തക്കാരിലൂടെ ശ്രീലങ്കയിലേക്ക് കൊറോണയെത്താതിരിക്കാന്‍ ലങ്കന്‍ നാവികസേന തീരപ്രദേശത്ത് പട്രോളിംഗ് ശക്തമാക്കി. ശ്രീലങ്കയുടെ വടക്ക്, പടിഞ്ഞാറ്, വടക്കുപടിഞ്ഞാറ് തീരപ്രദേശങ്ങളില്‍ പട്രോളിംഗ് ശക്തമാക്കിയതായി നാവികസേന മേധാവി പിയാല്‍ ഡിസില്‍വയാണ് വ്യക്തമാക്കിയത്.

സമുദ്രാതിര്‍ത്തി ലംഘിച്ച് ഇന്ത്യന്‍ മീന്‍പിടുത്തക്കാര്‍ ലങ്കന്‍ തീരത്തെത്താന്‍ സാദ്ധ്യതയുണ്ടെന്ന് ഡിസില്‍വ പറഞ്ഞു.

അടിയന്തരസാഹചര്യമുണ്ടായാല്‍ തയ്യാറായിരിക്കാന്‍ വ്യോമസേനക്കും ലങ്ക നിര്‍ദ്ദേശം നല്‍കിയിട്ടുണ്ട്. 198 പേര്‍ക്കാണ് ശ്രീലങ്കയില്‍ കൊവിഡ് ബാധിച്ചത്. ഏഴു പേര്‍ മരിച്ചു.