സ്റ്റാമ്പ്, കോയിൻ, കറൻസി, പുരാവസ്തുക്കൾ സൗദി ഫിലാറ്റലിക് & ന്യൂമിസ്മാറ്റിക് സൊസൈറ്റി എക്സിബിഷന് തുടക്കമായി.

എക്സിബിഷന്‍  സൗദി വിദ്യാഭ്യാസ അസിസ്റ്റന്റ് ചീഫ് എക്സിക്യൂട്ടീവ് ഓഫീസർ അബ്ദുൽ അസീസ് സബ് യാനി ഉദ്ഘാടനം ചെയ്യുന്നു. സമീപം റിയാദ് ഫിലാറ്റ ലിക് & ന്യൂമിസ്മാറ്റിക് സൊസൈറ്റി ഡയറക്റ്റർ മുബാറക് അൽ കഹ്താനി

അൽ  റവാബി തർബിയ നമൂതജ് സ്‌കൂൾ അങ്കണത്തിൽ വെച്ച നടന്ന പരിപാടി സൗദി വിദ്യാഭ്യാസ അസിസ്റ്റന്റ് ചീഫ് എക്സിക്യൂട്ടീവ് ഓഫീസർ അബ്ദുൽ അസീസ് സബ് യാനി ഉദ്ഘാടനം ചെയ്തു, അൽ റവാബി കോംപ്ലക്സ്  സൂപ്പർവൈസർ മൻസൂർ ബിൻ മൂസാ, ഇബ്രാഹിം ബിൻ മുഹമ്മദ്, റിയാദ് ഫിലാറ്റലിക് & ന്യൂമിസ്മാറ്റിക് സൊസൈറ്റി ഡയറക്റ്റർ മുബാറക് അൽ കഹ്താനി, സാദ് ബിൻ മുഹമ്മദ് അൽ ഇദ്രീസ്, കോഓർഡിനേറ്റർ അസീസ് കടലുണ്ടി എന്നിവർ സംസാരിച്ചു, സൗദി ഇന്ത്യൻ മാധ്യമ പ്രവർത്തകർ, ബിസിനസ് പ്രമുഖർ, പോസ്റ്റ് ഓഫീസ്, ഫിലാറ്റലി സൊസൈറ്റി ഡിപ്പാർട്മെന്റിലെ പ്രമുഖർ എന്നിവർ സന്നിഹിതരായിരുന്നു.

ഉദ്ഘാടന ശേഷം സ്റ്റാളുകൾ അബ്ദുൽ അസീസ് സബ് യാനിയുടെ നേതൃത്വത്തിൽ സന്ദർശനം നടത്തുകയും ചെയ്തു. ഫിലാറ്റലിക് സൊസൈറ്റി ഡയറക്റ്റർ മുബാറക് അൽ കഹ്താനി, ഫിലാറ്റലിസ്റ്റ് അസീസ് കടലുണ്ടി എന്നിവർ വിവരങ്ങൾ നൽകി.

സൗദിയുടെ പൗരാണിക ചരിത്രങ്ങൾ വിളിച്ചോതുന്ന സ്റ്റാമ്പ്, കോയിൻ, കറൻസി, മറ്റ് പൗരാണിക വസ്തുക്കൾ   കാണുവാനും, വാങ്ങുവാൻ താല്പര്യമുള്ളവർക്ക്‌ വേണ്ടി വിൽപ്പന സ്റ്റാളുകളും ഒരുക്കിയിട്ടുണ്ട്. സൗദിയുടെ ഒന്ന്,  അഞ്ച്,  പത്ത്,  അൻപത്,  നൂറ്, അഞ്ഞൂറ് എന്നിവയുടെ സ്വർണ്ണം പൂശിയ കറൻസിയും, ഇന്ത്യയുടെ പത്ത്,  നൂറ്, ആയിരം രൂപയുടെ കോയിനും, സ്വന്തം ഫോട്ടോയിൽ ഉള്ള ഇന്ത്യയുടെ മൈ സ്റ്റാമ്പ്, ഗാന്ധിജിയുടെ ചിത്രം ആലേഖനം ചെയ്ത് അൻപതിൽ കൂടുതൽ രാജ്യങ്ങൾ പുറത്തിറക്കിയ  വ്യത്യസ്ത സ്റ്റാമ്പുകൾ, പണ്ട് കാലത്ത് അറബ് നാടുകളിൽ ഉപയോഗിച്ച ഇന്ത്യൻ കറൻസികൾ എന്നിവ  മുഖ്യ ആകർഷണങ്ങളിൽ ഒന്നാണ്.

ഞായർ, തിങ്കൾ, ചൊവ്വ, ബുധൻ, വ്യാഴം എന്നീ ദിവസങ്ങളിൽ  രാവിലെ 9 മുതൽ  12 വരെയും, വൈകീട്ട് 4 മുതൽ 9 വരെയുമാണ് സന്ദർശന സമയം.  സ്കൂൾ അങ്കണ ത്തിൽ വെച്ച് നടക്കുന്ന എക്സിബിഷൻ വീക്ഷിക്കുവാൻ സ്‌കൂൾ കോളേജ് വിദ്യാർത്ഥി കളെ കൂടാതെ നാനാ തുറകളിൽ നിന്നും ഒരുപാട് പേര് വന്നുകൊണ്ടിരിക്കുന്നു.

കാണുവാൻ താല്പര്യമുള്ള വ്യക്തികൾക്ക് പ്രത്യേക പെർമിഷൻ ഇല്ലാതെ തന്നെ വരാവുന്നതാണ്, സംഘടന, സ്‌കൂൾ എന്നീ ലേബലിൽ വരുന്നവർ താഴെ കാണുന്ന നമ്പറിൽ ബന്ധപ്പെട്ട് അവരവരുടെ സമയം ഉറപ്പ് വരുത്തേണ്ടതാണ്. അബ്ദുൽ അസീസ് കടലുണ്ടി 0532528262