ട്രംപിനെ പ്രശംസിച്ച് നിക്കി ഹേലി , 2024 ലെ പിന്തുണ ട്രംപിനെന്ന്

അയോവ : ട്രംപിന്റെ വിദേശ നയങ്ങളെ വിദേശ നയങ്ങളെ പിന്തുണച്ചും അനധികൃത കുടിയേറ്റക്കാരുടെ എണ്ണം ക്രമാതീതമായി വർദ്ധിച്ച സാഹചര്യത്തിൽ അതിർത്തി പ്രദേശങ്ങളിൽ സന്ദർശനം നടത്തുമെന്ന ട്രംപിന്റെ പ്രഖ്യാപനത്തെ പ്രശംസിച്ചും മുൻ യു.എൻ അംബാസിഡർ നിക്കി ഹേലി .

2024 ലെ റിപ്പബ്ലിക്കൻ സ്ഥാനാർത്ഥിയായാൽ തന്റെ പിന്തുണ ട്രംപിന് ആയിരിക്കുമെന്നും വ്യാഴാഴ്ച (ജൂൺ 24 ന്) വൈകീട്ട് അയോവയിൽ നടത്തിയ പ്രസംഗത്തിൽ നിക്കി ഹേലി ആവർത്തിച്ചു . രാജ്യത്തെ ആദ്യ കോക്കസ് സംസ്ഥാനമായ അയോഅവയിൽ സംഘടിപ്പിച്ച റിപ്പബ്ലിക്കൻ പാർട്ടിയുടെ ലിങ്കൺ ഡിന്നറിനു മുൻപേയാണ്
ഹേലി ഈ പ്രസ്താവന നടത്തിയത് .

ജൂൺ 30 ന് ട്രംപ് യു.എസ് മെക്‌സിക്കോ അതിർത്തി സന്ദർശിക്കുമെന്ന് പ്രഖ്യാപിച്ചതിനെ തുടർന്നാണ് ബൈഡൻ കുടിയേറ്റ വിഷയത്തിൽ ചുമതലപ്പെടുത്തിയിരുന്നു വൈസ് പ്രസിഡന്റ് കമലാ ഹാരിസ് അതിർത്തി സന്ദർശനം നടത്താൻ തീരുമാനിച്ചതെന്ന് ഒളിയമ്പ് എയ്യുന്നതിനും നിക്കി ഹേലി മറന്നില്ല . ഇങ്ങനെ ഒരു സാഹചര്യം ഒരുക്കിയതിന് ട്രംപിനോട് നന്ദിയുണ്ടെന്നും ഹേലി പറഞ്ഞു.

ജനുവരി ആറിനുണ്ടായ സംഭവവികാസങ്ങളെ തുടർന്ന് ട്രംപിനെ ശക്തിയായി വിമർശിക്കുകയും ട്രംപിന്റെ രാഷ്ട്രീയ ഭാവി അവസാനിച്ചുവെന്ന് പരസ്യമായി പ്രഖ്യാപിക്കുകയും ചെയ്ത ഹേലി തികച്ചും വ്യത്യസ്തയായിട്ടാണ് പുതിയ പ്രസ്താവനയുമായി രംഗത്തെത്തിയത് .

'അമേരിക്ക ഫസ്റ്റ്' എന്ന ട്രംപിന്റെ പ്രഖ്യാപിത നയവും നോർത്ത് കൊറിയൻ ലീഡർ കിം ജോങ് ഉന്നിനെ 'ലിറ്റിൽ റോക്കറ്റ്മാൻ' എന്ന വിളിച്ചതും ജനങ്ങളുടെ കയ്യടി വാങ്ങാൻ ട്രംപിന് കഴിഞ്ഞതായും ഹേലി പറഞ്ഞു . 2024 ലെ പ്രസിഡന്റ് സ്ഥാനാർത്ഥി ഹേലി ആയിരിക്കുമെന്ന പ്രചരണം ശക്തിപ്പെടുന്നതിനിടയിലാണ് ട്രംപിനെ പിന്തുണച്ചും പ്രശംസിച്ചും നിക്കിയുടെ പ്രസ്താവന .