കൊല്ലം ; ഭര്ത്താവിന്റെ വീട്ടില് തൂങ്ങി മരിച്ച നിലയില് കണ്ടെത്തിയ നിലമേല് സ്വദേശിനി വിസ്മയക്ക് ഭര്ത്താവില് നിന്നും നേരിടേണ്ടി വന്നത് സ്ത്രീധനത്തിന്റെ പേരില് കൊടും ക്രൂരമായ പീഡനം. നൂറ് പവന് സ്വര്ണവും ഒരു ഏക്കര് 25 സെന്റ് സ്ഥലവും ഇതിന് പുറമേ പത്ത് ലക്ഷം രൂപ വിലവരുന്ന ഒരു കാറുമായിരുന്നു വിസ്മയയുടെ വീട്ടുകാര് സ്ത്രീധനമായി നല്കിയിരുന്നത്. എന്നാല് കാറ് ഭര്ത്താവ് കിരണിന് ഇഷ്ടപ്പെടാതെ വന്നതോടെയാണ് പ്രശ്നങ്ങള് തുടങ്ങിയതെന്ന് വിസ്മയയുടെ പിതാവ് പറയുന്നു.
പിതാവിന്റെ വാക്കുകളിങ്ങനെ
കാറ് വേണ്ട പകരം പണം മതിയെന്നായിരുന്നു കിരണിന്റെ ആവശ്യം. അത് മകള് എന്നോട് പറഞ്ഞു. എന്നാല് സി.സിയിട്ട് വാങ്ങിയ കാറാണെന്നും വില്ക്കാന് കഴിയില്ലെന്നും ഞാന് വ്യക്തമാക്കി. അതോടെ ആ കാര്യം പറഞ്ഞ് മകളെ നിരന്തരം ഉപദ്രവിക്കാന് തുടങ്ങി. സി.സി ഇട്ട് വാങ്ങിയതാണ് കാറെന്ന് അറിഞ്ഞതിന് ശേഷം കഴിഞ്ഞ ജനുവരില് രാത്രി 1 മണിയോടെ കിരണ് മകളുമായി വീട്ടില് വന്നു. വണ്ടി വീട്ടില് കൊണ്ടയിട്ടു. മകളെ അവിടെ വെച്ച് അടിച്ചു. തടയാന് ശ്രമിച്ച വിസ്മയയുടെ സഹോദരനെയും അടിച്ചു. അതോടെ പൊലീസ് പരാതി നല്കി. ആ പൊലീസ് സ്റ്റേഷനിലെ എസ് ഐയെ കിരണ് കയ്യേറ്റം ചെയ്യാന് ശ്രമിച്ചു',
പോലീസിനെ മര്ദിച്ച ശേഷം പരിശോധനയില് കിരണ് മദ്യപിച്ചിരിക്കുകയാണെന്ന് തെളിഞ്ഞു. അവിടത്തെ സി.ഐ പറഞ്ഞത് അനുസരിച്ച് എഴുതി ഒപ്പിട്ട് നല്കിയ ശേഷമാണ് അവനെ വിട്ടയച്ചത്. അതിന് ശേഷം കുറച്ച് ദിവസം മകള് സ്വന്തം വീട്ടിലായിരുന്നു. എന്നാല് പരീക്ഷാ സമയമായതോടെ കിരണ് വന്ന് മകളെ തിരിച്ച് വീട്ടിലേക്ക് കൂട്ടികൊണ്ട് പോയതായിരുന്നുവെന്നും' വിസ്മയയുടെ പിതാവ് ത്രിവിക്രമന് നായര് പറഞ്ഞു.