കൊല്ലപ്പെട്ടത് വേല്‍മുരുകനാണെങ്കില്‍ അത് തിരിച്ചറിയാന്‍ അനുവദിക്കണം;  മൃതദേഹം കാണണമെന്നാവശ്യപ്പെട്ട് ബന്ധുക്കള്‍

വയനാട്‌ : ചൊവ്വാഴ്ച്ച മാവോയിസ്റ്റും പൊലീസുമായി നടന്ന ഏറ്റുമുട്ടലില്‍ വെടിയേറ്റ് കൊല്ലപ്പെട്ടയാളുടെ മൃതദേഹം കാണണമെന്നാവശ്യപ്പെട്ടു കൊണ്ട് ബന്ധുക്കള്‍ ആഭ്യന്തര വകുപ്പ് സെക്രട്ടറിക്ക് കത്തയച്ചു.

മരിച്ചത് തമിഴ്‌നാട് സ്വദേശി വേല്‍മുരുകനാണെന്ന് പൊലീസ് ചൊവ്വാഴ്ച്ച തന്നെ സ്ഥിരീകരിച്ചിരുന്നു. കൊല്ലപ്പെട്ട വേല്‍മുരുകന്റെ സഹോദരനും അഭിഭാഷകനുമായ മുരുകനാണ് കത്തയച്ചിരിക്കുന്നത്.

കൊല്ലപ്പെട്ടത് വേല്‍മുരുകനാണെങ്കില്‍ അത് തിരിച്ചറിയാന്‍ അനുവദിക്കണം. ഈ ആവശ്യമുന്നയിച്ച് വയനാട് കളക്ടറെ സമീപിച്ചപ്പോള്‍ അനുവദിച്ചില്ലെന്നായിരുന്നു മരുപടിയെന്നും ഇക്കാര്യത്തില്‍ ആഭ്യന്തര സെക്രട്ടറി ഇടപെടണമെന്നുമാവശ്യപ്പെട്ടാണ് കത്തയച്ചിരിക്കുന്നത്. മരിച്ചത് സഹോദരനാണെങ്കില്‍ മൃതശരീരം വിട്ടുകിട്ടണമെന്നും കത്തില്‍ ആവശ്യപ്പെടുന്നുണ്ട്.