ന്യൂഡല്ഹി: ഡല്ഹിയിലെ വാര്ത്താസമ്മേളനത്തിനിടെ യുഎസ് പ്രസിഡന്റ് ഡോണള്ഡ് ട്രംപും സിഎന്എന് റിപ്പോര്ട്ടറും തമ്മില് വാക്പോര്. സിഎന്എന് വൈറ്റ് ഹൗസ് ചീഫ് കറസ്പോണ്ടന്റ് ജിം അക്കോസ്റ്റയാണ് ട്രംപുമായി വാര്ത്താസമ്മേളനത്തിനിടെ വാക്പോരില് ഏര്പ്പെട്ടത്. നേരത്തെയും, അക്കോസ്റ്റ ട്രംപുമായി വാക്പോരില് ഏര്പ്പെട്ടിരുന്നു.
അക്കോസ്റ്റയുടെ പ്രസ് പാസ് അന്നു വൈറ്റ് ഹൗസ് റദ്ദാക്കി. എന്നാല് ഇതിനെതിരേ സിഎന്എന് കോടതിയെ സമീപിക്കുകയും അക്കോസ്റ്റയ്ക്ക് പാസ് വീണ്ടും കിട്ടുകയും ചെയ്തിരുന്നു. പ്രസിഡന്റായി ചുമതലയേറ്റ ശേഷം ട്രംപ് സിഎന്എന്നിന് അഭിമുഖങ്ങള് നല്കിയിട്ടില്ല.
മാധ്യമങ്ങളെ കാണുന്നതിനിടെ, യുഎസ് തെരഞ്ഞെടുപ്പിലെ റഷ്യന് ഇടപെടല് സംബന്ധിച്ച് അക്കോസ്റ്റ ചോദ്യമുന്നയിച്ചു. ഇതിനു മറുപടിയായി, നുണ പറഞ്ഞതിനു കഴിഞ്ഞ ദിവസം മാപ്പു പറഞ്ഞില്ലേ എന്ന് അക്കോസ്റ്റയോടു ട്രംപ് ചോദിച്ചു. ഇതിനോടു പ്രതികരിച്ച അക്കോസ്റ്റ, സത്യം പറയുന്ന കാര്യത്തില് നിങ്ങളേക്കാള് വളരെ മെച്ചമാണ് തങ്ങളുടെ റെക്കോഡ് എന്ന് ട്രംപിനോടു തിരിച്ചടിച്ചു. വിട്ടുകൊടുക്കാന് തയാറാകാതെ ട്രംപ്, ബ്രോഡ്കാസ്റ്റിംഗ് ചരിത്രത്തിലെ ഏറ്റവും മോശപ്പെട്ട റെക്കോഡാണ് നിങ്ങള്ക്കുള്ളതെന്നും ലജ്ജിക്കണമെന്നും പറഞ്ഞു. ഇക്കാര്യത്തില്, താനോ തന്റെ സ്ഥാപനമോ ലജ്ജിക്കുന്നില്ല എന്നായിരുന്നു അക്കോസ്റ്റയുടെ മറുപടി.