ലോകമെമ്പാടു നിന്നും സന്ദർശകരും ക്രിസ്തുമത വിശ്വാസികളും ബെത്‌ലെഹേമും യെരുശലേമും സന്ദർശിക്കാൻ വന്നുകൊണ്ടിരിക്കുകയാണ്; ഇക്കൊല്ലം അത്ര മികച്ചതാകില്ലെങ്കിലും 2023 ൽ സന്ദർശകരുടെ എണ്ണം കുതിച്ചുയരും; ദൈവം അനുഗ്രഹിക്കുകയാണെങ്കിൽ കൊറോണ വൈറസിന് മുമ്പത്തെ അതേ അവസ്ഥയിലേക്കു ഞങ്ങൾ ഈ വർഷം മടങ്ങും, ഒരുപക്ഷേ അതിലും മികച്ചതായിരിക്കും ! ക്രിസ്തുമസ്സ് സഞ്ചാരികളെ വരവേൽക്കാൻ ഒരുങ്ങി ബെത്ലെഹേം, പ്രതീക്ഷയോടെ മേയര്‍ ഹന്ന ഹനാനിയ !

ക്രിസ്തുമസ്സ് സഞ്ചാരികളെ വരവേൽക്കാൻ ബെത്ലെഹേം ഒരുങ്ങിക്കഴിഞ്ഞു.

കോവിഡ് കാലത്തെ രണ്ടുവർഷ ഇടവേളയ്ക്കുശേഷം ടൂറിസം മേഖല അതിൻ്റെ പൂർണനിലയിൽ വീണ്ടെടുപ്പു നടത്തിയിട്ടില്ലെങ്കിലും, സന്ദർശകരുടെ പ്രവാഹം പ്രോത്സാഹജനകമായ സന്ദേശമാണ് ക്രിസ്തുമസ്സ് കാലത്ത് നൽകുന്നത്.

ഇത്തവണ ബത്ലെഹേം തയ്യറെടുപ്പിലാണ്. സമീപ വർഷങ്ങളിലെ ലോക്ക്ഡൗണുകളും യാത്രാ നിയന്ത്രണങ്ങളും മൂലം ഹോളി ലാൻഡ് ആരാധനാലയങ്ങൾ സന്ദർശിക്കാൻ വിനോദസഞ്ചാരികൾക്ക് കഴിഞ്ഞിരുന്നില്ല.

2022 ഒരു പുത്തനുണർവാണ് സമ്മാനിക്കുന്നത്. ലോകമെമ്പാടു നിന്നും സന്ദർശകരും ക്രിസ്തുമത വിശ്വാസികളും ക്രിസ്തുദേവന്റെ ജന്മസ്ഥലമായ ഇസ്രായേൽ നിയന്ത്രിത വെസ്റ്റ് ബാങ്കിലുള്ള ബെത്‌ലെഹേമും യെരുശലേമും സന്ദർശിക്കാൻ വന്നുകൊണ്ടിരിക്കുകയാണ്.

ഇക്കൊല്ലം അത്ര മികച്ചതാകില്ലെങ്കിലും 2023 ൽ സന്ദർശകരുടെ എണ്ണം കുതിച്ചുയരുമെന്നും ബിസിനസ്സ് മികച്ചതായിരിക്കുമെന്നും പ്രതീക്ഷിക്കുന്നതായി ബെത്‌ലഹേം ഹോട്ടൽ ഉടമയായ അർജ പറയുന്നു.

കാരണം ലോകം മുഴുവൻ, പ്രത്യേകിച്ച് ക്രിസ്ത്യൻ മത വിശ്വാസികളെല്ലാം ഈ വിശുദ്ധ നാട് ജീവിതത്തിൽ ഒരുതവണയെങ്കിലും കാണാനാഗ്രഹിക്കുന്നവരാണ്.

പലസ്തീൻകാർക്ക് സ്വന്തമായി വിമാനത്താവളമില്ലാത്തതിനാൽ, അന്താരാഷ്ട്ര സന്ദർശകരെല്ലാം ഇസ്രായേൽ വഴിയാണ് വരുന്നത്.

ക്രിസ്മസ് കാലയളവിൽ ആ ഒരാഴ്ചക്കാലം മാത്രം ഏകദേശം 1,20,000 സന്ദർശകരെയാണ് ഇസ്രായേൽ ടൂറിസം മന്ത്രാലയം പ്രതീക്ഷിക്കുന്നത്. 2019 ൽ ഒന്നരലക്ഷം ആളുകളാണ് എത്തിയിരുന്നത്.

ദൈവം അനുഗ്രഹിക്കുകയാണെങ്കിൽ കൊറോണ വൈറസിന് മുമ്പത്തെ അതേ അവസ്ഥയിലേക്കുതന്നെ ഞങ്ങൾ ഈ വർഷം മടങ്ങും, ഒരുപക്ഷേ അതിലും മികച്ചതായിരിക്കും എന്നാണ് ബെത്‌ലഹേം മേയർ ഹന്ന ഹനാനിയ പറഞ്ഞത്.