കുവൈറ്റില്‍ യുവാക്കള്‍ക്ക് മികച്ച തൊഴില്‍ അവസരങ്ങളുമായി യൂത്ത് ഇന്ത്യ ജോബ്‌ഫെയര്‍

കുവൈറ്റ് : കുവൈറ്റില്‍ യുവാക്കള്‍ക്ക് മികച്ച തൊഴില്‍ അവസരങ്ങളുമായി സംഘടിപ്പിച്ച യൂത്ത് ഇന്ത്യ ജോബ്‌ഫെയര്‍ 2019ന് സമാപനമായി. രാജ്യത്ത് സ്വദേശി വത്ക്കരണം ശക്തമാക്കിയിരിക്കുന്ന അവസരത്തില്‍ തന്നെയാണ് യുവാക്കള്‍ക്ക് മികച്ച അവസരങ്ങളുമായി യൂത്ത് ഇന്ത്യ ജോബ്‌ഫെയര്‍ സംഘടിപ്പിച്ചത്.

വിവിധ കമ്പനികള്‍ക്ക് വേണ്ടിയുള്ള ഇന്റര്‍വ്യൂകളില്‍ ആയിരക്കണക്കിന് യുവാക്കളാണ് പങ്കെടുത്തത്. യൂത്ത് ഇന്ത്യ വെബ്‌സൈറ്റില്‍ രജിസ്റ്റര്‍ ചെയ്ത രണ്ടായിരത്തോളം യുവാക്കളില്‍ നിന്നാണ് ആയിരത്തോളം പേര്‍ക്ക് ഇന്റര്‍ വ്യൂകളില്‍ പങ്കെടുക്കാന്‍ അവസരം ലഭിച്ചത്.

കുവൈറ്റിലെ മംഗഫിലുള്ള നജാത്ത് സ്‌കൂളിലാണ് പരിപാടി സംഘടിപ്പിച്ചത്. നിരവധി യുവാക്കള്‍ക്ക് നിലവിലുള്ള ജോലിയില്‍ നിന്ന് കൂടുതല്‍ മികച്ച തൊഴിലിലേക്ക് മാറാനും നൂറുകണക്കിന് പേര്‍ക്ക് പുതിയ ജോലി കണ്ടെത്താനും ജോബ്‌ഫെയര്‍ സഹായകമായി.

കെ.ഡി.ഡി, ഫവാസ്, മലബാർ ഗേള്‍ഡ്‌, ഗോ സിറ്റി, സിറ്റി ബസ്, ടാലൻറ്​ ഹണ്ട്, ഗ്ലോബല്‍ എച്ച്.ആർ സെലൂഷന്‍സ്, റെഡ് ടാഗ്, ആൻറല്‍ തുടങ്ങിയ കമ്പനികളുടെ പ്രധിനിധികൾ ഉദ്യോഗാർഥികളെ നേരിട്ട്​ ഇൻറവ്യൂ നടത്തി. രാവിലെ 8.30ന്​ ആരംഭിച്ച ജോബ്‌ഫെയർ വൈകീട്ട് ആറുമണി വരെ നീണ്ടു.

സി.വി ക്ലിനിക്, കരിയർ ഗൈഡന്‍സ്, മോക്​ ഇൻറർവ്യൂ, കരിയറുമായി ബന്ധപ്പെട്ട വിവിധ വിഷയങ്ങളിലുള്ള സെമിനാർ എന്നിവ നടന്നു.

യൂത്ത് ഇന്ത്യ കരിയര്‍ കണ്‍വീനര്‍ നിയാസ്, പ്രസിഡൻറ്​ മഹനാസ്മുസ്തഫ, ജനറൽ സെക്രട്ടറി ഷഫീര്‍ അബൂബക്കര്‍, റിശ്ദിൻ അമീര്‍, റഫീക്ക് ബാബു, അംജദ്, ഷാഫി കോയമ്മ, ഹാറൂണ്‍, ഫഹീം, ശിഹാബുദ്ദീന്‍, സനോജ്, ഹസീബ്, ഹാഫിസ്, സലീജ്, നിഹാദ്, ഉസാമ, ഖലീല്‍, സിജില്‍, ജഫീര്‍, ഫവാസ് എന്നിവര്‍ ജോബ്‌ഫയറിന്​ നേതൃത്വം നല്‍കി.