മുംബൈ: യുവരാജ് സിംഗ് രാജ്യാന്തര ക്രിക്കറ്റില് നിന്ന് വിരമിച്ചു. രാജ്യാന്തര ക്രിക്കറ്റില് നിന്ന് പാഡഴിക്കുന്ന യുവിയെ കാനഡയിലെ ജി ടി20, യൂറോ ടി20 ടൂര്ണമെന്റുകളില് ആരാധകര്ക്ക് തുടര്ന്നും കാണാനാകും.
2000ല് കെനിയക്കെതിരെ ഏകദിന ക്രിക്കറ്റില് അരങ്ങേറിയ യുവരാജ് 304 ഏകദിനങ്ങളില് ഇന്ത്യക്കായി കളിച്ചു. 40 ടെസ്റ്റിലും 58 ടി20 മത്സരങ്ങളിലും ഇന്ത്യന് ജേഴ്സി അണിഞ്ഞ യുവരാജ് 2007ലെ ടി20 ലോകകപ്പ് നേട്ടത്തിലും 2011ലെ ഏകദിന ലോകകപ്പ് നേട്ടത്തിലും നിര്ണായക പങ്കുവഹിച്ചു.
2011ലെ ഏകദിന ലോകകപ്പില് 362 റണ്സും 15 വിക്കറ്റും സ്വന്തമാക്കിയ യുവിയായിരുന്നു ഇന്ത്യ കിരീടം നേടിയപ്പോള് ടൂര്ണമെന്റിന്റെ താരം.
ഇന്ത്യക്കായി 58 ടി20 മത്സരങ്ങളില് കളിച്ച യുവി 136.38 പ്രഹരശേഷിയില് 1177 റണ്സടിച്ചു. എട്ട് അര്ധസെഞ്ചുറിയും ഇതില് ഉള്പ്പെടുന്നു. 28 വിക്കറ്റുകളും സ്വന്തമാക്കി. 2017ല് വെസ്റ്റ് ഇന്ഡീസിനെതിരെ ആണ് യുവി ഏകദിനങ്ങളില് അവസാനമായി ഇന്ത്യന് ജേഴ്സി അണിഞ്ഞത്. 2017ല് ഇംഗ്ലണ്ടിനെതിരെ ആയിരുന്നു അവസാന ടി20 മത്സരം.
രാജ്യാന്തര ക്രിക്കറ്റില് നിന്ന് പാഡഴിക്കുന്ന യുവിയെ കാനഡയിലെ ജി ടി20, യൂറോ ടി20 ടൂര്ണമെന്റുകളില് ആരാധകര്ക്ക് തുടര്ന്നും കാണാനാകും. ഇതിനായി യുവരാജ് ബിസിസിഐയുടെ അനുമതി തേടിയിരുന്നു.