ഡല്ഹി: സംസ്ഥാന നിയമസഭാ തെരഞ്ഞെടുപ്പിൽ എതിരില്ലാതെ തിരഞ്ഞെടുക്കപ്പെട്ട 10 ബിജെപി സ്ഥാനാർത്ഥികളിൽ അരുണാചൽ പ്രദേശ് മുഖ്യമന്ത്രി പേമ ഖണ്ഡുവും ഉപമുഖ്യമന്ത്രി ചൗന മേയും ഉൾപ്പെടുന്നുവെന്ന് ഉദ്യോഗസ്ഥർ.
നാമനിർദ്ദേശ പത്രിക പിൻവലിക്കൽ സമയം അവസാനിച്ചതിനെ തുടർന്ന് ഖണ്ഡുവും മറ്റ് ഒമ്പത് പേരും എതിരില്ലാതെ തിരഞ്ഞെടുക്കപ്പെട്ടതായി മുഖ്യ തിരഞ്ഞെടുപ്പ് ഓഫീസർ പവൻ കുമാർ സെയ്ൻ മാധ്യമങ്ങളോട് പറഞ്ഞു.
തവാങ് ജില്ലയിലെ മുക്തോ അസംബ്ലി മണ്ഡലത്തിൽ നിന്ന് നാമനിർദേശ പത്രിക സമർപ്പിച്ച ഏക വ്യക്തി ഖണ്ഡുവാണ്.
അതേസമയം ഉപമുഖ്യമന്ത്രി ചൗന മേൻ ചൗഖാം സീറ്റിൽ എതിരില്ലാതെ വിജയിച്ചത് കോൺഗ്രസിലെ ബയാംസോ ക്രി നാമനിർദ്ദേശ പത്രിക പിൻവലിച്ചതിനെ തുടർന്നാണ്.ആറ് നിയമസഭാ മണ്ഡലങ്ങളിൽ ഒറ്റ നാമനിർദ്ദേശ പത്രിക സമർപ്പിച്ചപ്പോൾ മറ്റ് നാലിടത്ത് പ്രതിപക്ഷ സ്ഥാനാർത്ഥികൾ പത്രിക പിൻവലിച്ചതായും അദ്ദേഹം പറഞ്ഞു.
60 അംഗ നിയമസഭയിലെ മറ്റ് മണ്ഡലങ്ങളിലേക്കും രണ്ട് ലോക്സഭാ സീറ്റുകളിലേക്കും ഏപ്രിൽ 19 നാണ് തിരഞ്ഞെടുപ്പ്.