ലോകത്തിലെ ഏറ്റവും വിലയേറിയ എസ് യുവി ‘കാൾമാൻ കിങ്സ്’ പുറത്തിറങ്ങി

Thursday, March 22, 2018

ലോകത്തില്‍ എസ് യുവികളിലെ ഏറ്റവും വിലയേറിയ കാര്‍ ‘കാൾമാൻ കിങ്സ്’ ചൈനീസ് കാർ നിർമ്മാതാക്കൾ പുറത്തിറക്കി. നിരവധി ഫീച്ചറുകളുമായാണ് ഈ കാര്‍ ഉപയോക്താക്കളിലേക്കെത്തുന്നത്. വൻ വിലകാരണം ചെലവാകാൻ അത്ര എളുപ്പമല്ലാത്തതിനാൽ വെറും പത്ത് കാറുകള്‍ മാത്രമാണ് നിർമ്മാതാക്കൾ പുറത്തിറക്കിയിരിക്കുന്നത്.

അതുല്യമായ എക്സ്റ്റീരിയറിന് പുറമെ ഇന്റീരിയറും സ്വപ്ന സമാനമാണ്. ആഡംബര സീറ്റുകൾ, ഗെയിംസ് കൺസോൾസ്, ഷാംപയിൻ ഫ്രിഡ്ജ് തുടങ്ങിയവ ഇതിനകത്തുണ്ട്. ഈ വാഹനത്തിലെ മിക്ക ഇന്റീരിയർ ഫീച്ചറുകളും നിയന്ത്രിക്കുന്നത് ആപ്പുകളിലൂടെയാണ്.

അതായത് സീറ്റുകൾ, എയർ പ്യൂരിഫയർ, ഫ്ലാറ്റ് സ്‌ക്രീൻ ടിവി, ഇൻഡോർ നിയോൺ ലൈറ്റുകൾ തുടങ്ങിയവയെല്ലാം ആപ്പുകളിലൂടെ നിയന്ത്രിക്കപ്പെടുന്നു. ഷാംപയിൻ ഫ്രിഡ്ജിന് പുറമെ ഇതിനകത്ത് എസ്പ്രെസ്സോ മെഷീൻ, പ്ലേസ്റ്റേഷൻ 4 തുടങ്ങിയ ആധുനിക സൗകര്യങ്ങളുമുണ്ട്.

മണിക്കൂറിൽ 140 കിലോമീറ്ററാണ് ഈ വാഹനത്തിന്റെ പരമാവധി വേഗത. ഷാർപ്പ് ആംഗിൾ എക്സ്റ്റീരിയർ കാർബൺ ഫൈബർ, സ്റ്റീൽ എന്നിവയാലാണ് നിർമ്മിച്ചിരിക്കുന്നത്. 4.5 ടണ്ണാണ് കാറിന്റെ ഭാരം. ഇത് ബുള്ളറ്റ് പ്രൂഫാക്കുന്നതിനായി താൽപര്യപ്പെടുന്നവർക്ക് ഇതിന്റെ ചേസിസ് അപ്ഗ്രേഡ് ചെയ്യാനുള്ള സൗകര്യമുണ്ട്. ഇതിലൂടെ ഇതിന്റെ ഭാരം ആറ് ടൺ വരെയാവുകയുംചെയ്യും.

×