റിലീസിന് മുമ്പേ ‘കര്‍വാന്‍ ' പ്രദർശിപ്പിച്ചു : ചികിത്സയില്‍ കഴിയുന്ന നടന്‍ ഇര്‍ഫാന്‍ ഖാനു വേണ്ടി കര്‍വാന്റെ പ്രത്യേക പ്രദര്‍ശനം ലണ്ടനില്‍ നടത്തി

ലണ്ടനില്‍ ചികിത്സയില്‍ കഴിയുന്ന നടന്‍ ഇര്‍ഫാന്‍ ഖാനു വേണ്ടി കര്‍വാന്റെ പ്രത്യേക പ്രദര്‍ശനം നടത്തി. ന്യൂറോ എന്‍ഡോ ക്രെയ്ന്‍ ട്യൂമര്‍ ബാധിച്ച് ചികിത്സയില്‍ കഴിയുന്ന ഇര്‍ഫാന്‍ തന്റെ തന്റെ ചിത്രം റിലീസിനു മുമ്പ് കാണണം എന്ന് ആഗ്രഹം പ്രകടിപ്പിക്കുകയായിരുന്നു. ലണ്ടനിലെ ഹെന്റി വുഡ് ഹൗസിലാണ് ചിത്രം പ്രദര്‍ശിപ്പിച്ചത്. ഇര്‍ഫാന്‍ ഖാനോടൊപ്പം ഭാര്യ സുതപ സിക്തറും കര്‍വാന്റെ പ്രദര്‍ശനത്തിനെത്തിയിരുന്നു. സ്‌ക്രീനില്‍ തന്നെ കാണുമ്പോള്‍ ഇര്‍ഫാന്‍ ഖാന്‍ വളരെയധികം സന്തോഷവാനായി അനുഭവപ്പെട്ടുവെന്ന് കര്‍വാന്റെ ഡയലോഗ് റൈറ്റര്‍് ഹുസൈന്‍ ദലാല്‍ പറയുന്നു. ചില അടുത്ത സുഹൃത്തുക്കളും അദ്ദേഹത്തോടൊപ്പം പ്രദര്‍ശനം കാണാന്‍ ഉണ്ടായിരുന്നു.

ദുല്‍ഖര്‍ സല്‍മാന്റെ ബോളിവുഡ് അരങ്ങേറ്റ ചിത്രം കര്‍വാന്‍ ആരാധകരില്‍ വലിയ പ്രതീക്ഷയാണ് ഉണര്‍ത്തുന്നത്. മൂന്നു സുഹൃത്തുക്കളുമൊത്ത് ബംഗളൂരുവില്‍ നിന്ന് കൊച്ചി വരെയുള്ള ദുല്‍ഖറിന്റെ കഥാപാത്രത്തിന്റെ രസകരമായ യാത്രയാണ് ചിത്രത്തിന്റെ ഇതിവൃത്തം. ആകര്‍ഷ് ഖുരാന സംവിധാനം ചെയ്യുന്ന ഈ ചിത്രം കോമഡിക്ക് മുന്‍തൂക്കം നല്‍കിയാണ് അവതരിപ്പിച്ചിരിക്കുന്നത്.

റോഡ് മൂവി ഗണത്തില്‍പ്പെട്ട ചിത്രത്തില്‍ ഇര്‍ഫാന്‍ ഖാനും പ്രധാന വേഷത്തില്‍ എത്തുന്നുണ്ട്. നവാഗതയായ മിഥില പാല്‍ക്കറാണ് ചിത്രത്തിലെ നായിക. ഹുസൈന്‍ ദലാല്‍, അക്ഷയ് ഖുറാന എന്നിവര്‍ ചേര്‍ന്നാണ് ചിത്രത്തിന് തിരക്കഥ എഴുതിയത്. റോണി സ്‌ക്രൂവാലയാണ് ചിത്രത്തിന്റെ നിര്‍മാണം.