താര കല്യാണിന് ശബ്ദം തിരിച്ചു കിട്ടുമോ? എ ഐ വഴി മറുപടി നൽകി താരം; അസുഖവും ചികിത്സയും വ്യക്തമാക്കി ഡോക്ടർ

സിനിമാ സീരിയൽ താരം കല്യാണിന്റെ ശബ്ദം നഷ്ടപ്പെട്ട വാർത്ത വലിയ രീതിയിൽ ചർച്ചയായിരുന്നു. ഇപ്പോഴിതാ രോഗവും ചികിത്സയും സംബന്ധിച്ച ഒരു വീഡിയോയുമായി രംഗത്തെത്തിയിരിക്കുകയാണ് താര കല്യാണും, താരത്തിന്റെ ഡോക്ടറും. സ്വന്തം യൂട്യൂബ് ചാനലിൽ പങ്കുവെച്ച വിഡിയോയിൽ എ ഐ സംവിധാനം വഴിയാണ് താര കല്യാൺ സംസാരിച്ചത്. തുടർന്ന് രോഗത്തെ കുറിച്ച് കൂടുതൽ വിവരങ്ങൾ പങ്കുവെച്ചത് ഡോക്ടറാണ്.

‘സർജറി കഴിഞ്ഞ് രണ്ടാഴ്ചയായി. ശബ്ദം തീരെ ഇല്ലെന്നുതന്നെ പറയാം. വീഡിയോ എടുക്കുന്നത് എഐ വഴിയാണ്. എത്രയും വേഗം ശബ്ദം തിരികെ കിട്ടി സ്വന്തം ശബ്ദത്തിൽ വീഡിയോ എടുക്കണമെന്ന് ആഗ്രഹമുണ്ട്’, എന്ന് പറഞ്ഞാണ് താര കല്യാൺ വീഡിയോ ആരംഭിച്ചത്. തുടർന്ന് ഡോക്ടറാണ് വിവരങ്ങൾ പങ്കുവെച്ചത്.

ഉറപ്പായും ശബ്ദം തിരികെ വരും. എല്ലാ രോഗികളിലും അത് തിരികെ കിട്ടാൻ സമയത്തിൽ വ്യത്യാസം വരും. സ്പാസ്മോഡിക് ഡിസ്ഫോനിയ എന്ന പേര് ഭീകരമാണെങ്കിലും രോഗം അത്ര ഭീകരം അല്ല. വ്യക്തമായ കാരണം അറിയില്ല. പക്ഷെ ഇത് ഉണ്ടാകുന്നത് ഒരു പക്ഷെ ശബ്ദം ഒരുപാട് സമയം ഉപയോഗിക്കുന്നതുകൊണ്ടാകാം. സാധാരണ ഇതിന്റെ മെഡിസിനെന്ന് പറയുന്നത് ബോട്ടോക്സാണ്. അത് വോക്കൽ കോഡിലേക്ക് ഇൻജെക്റ്റ് ചെയ്യുക എന്നുള്ളതാണ് പതിവ്. എന്നാൽ ആറുമാസത്തിൽ കൂടുതൽ അതിന്റെ എഫെക്ട് കിട്ടാൻ പ്രയാസമാണ്. എങ്കിലും കൂടുതലും ആളുകൾ ഇതാണ് എടുക്കുന്നത്. കേരളത്തിലെ ജനസംഖ്യയിൽ ആയിരം പേരോളം ആളുകൾ ഈ രോഗം സഹിക്കുന്നവരാണ്. സർജറി ചെയ്യാൻ ചിലർക്ക് ഭയമാണ്.