മല മയങ്ങുന്നു മാനം തെളിയുന്നു (കവിത)

മേലെ കതിരോന്റെ കൈവിരൽ തൊട്ടപ്പോൾ 

താഴെ മരതകക്കാടുപൂത്തേ.. 

കല്ലടിക്കോടൻ കരിമലയ്ക്കുള്ളിലെ 

കന്മദം പൂത്തതും ഞാനറിഞ്ഞേ..

കൊട്ടകൾ വിൽക്കാൻ ഞാൻ 

കോങ്ങാട് പോകുമ്പോൾ 

മീൻവല്ലച്ചാട്ടത്തിൻ പോക്കു കണ്ടേ.. 

തുപ്പനാടൻപുഴ ചേലിൽ കുളിയ്ക്കും പൊൻ- 

മാനിന്റെ ചുണ്ടത്ത് മീൻ പെടഞ്ഞേ..

കാഞ്ഞിരപ്പുഴ പാലം വട്ടമിട്ടെത്തിയ 

കാറ്റിൻ മുളം തണ്ടിൽ തേൻ കിനിഞ്ഞേ.. 

കല്ലിന്റെ നാടിൻ കരളിൻ കുറിപ്പുകൾ 

വായിയ്ക്കാൻ മാരിവിൽ പെണ്ണുവന്നേ.. 

-ജയലക്ഷ്മി കവുക്കോടത്ത്