നായ്ക്കാലം (കവിത)

തെരുവിലലഞ്ഞു നടക്കും ഞങ്ങൾ 

തുരുതുരെ നിങ്ങളെ ശല്യം ചെയ്യും 

ബൈക്കിൽ ചെത്തിനടക്കുന്നോരുടെ 

മുന്നിൽച്ചാടി മറിച്ചിട്ടീടും 

ഓടിച്ചിട്ടു കടിക്കും ഞങ്ങൾ 

പേടിച്ചോടിയകന്നെന്നാലും 

ആരാ ചോദ്യം ചെയ്യാനായി

പോരുന്നോരിവിടെന്നറിയേണം

കൊല്ലാം നിങ്ങൾക്കാടുകൾ പന്നികൾ 

കാളകൾ പോത്തുകൾ മനുജന്മാരേം 

ഞങ്ങടെമേലേ കൈവച്ചെന്നാൽ

എങ്ങനെയുണ്ടെന്നറിയും നിങ്ങൾ 

നിങ്ങൾക്കുള്ളൊരു രൂപം പൂണ്ടോർ ഞങ്ങടെ

സോദരരുണ്ടീയുലകിൽ 

അവരുണ്ടല്ലോ ചോദിച്ചീടാൻ 

എവിടേം ഞങ്ങൾ മുന്നിൽത്തന്നെ 

പേവിഷബാധയ്ക്കുള്ള മരുന്നുക- 

ളാവുംപോൽ വിൽക്കേണമതിന്നായ് 

മനുജരെ വിഡ്ഢികളാക്കും നിയമം 

ഇനിയും പലതുണ്ടാവാമിവിടെ 

അധികം വൈകില്ലല്ലോ ശുനകർ 

അധികാരത്തിൽ കൈവച്ചീടാൻ 

ഞങ്ങൾ നാടു ഭരിക്കും  കാലം 

മോങ്ങും നിങ്ങൾ ഞങ്ങളെ നോക്കി

- ജോർജുകുട്ടി താവളം