കൊല്ലം : വെഡ്ഡിങ് മാള് ഉദ്ഘാടനത്തിനെത്തിയ ചലച്ചിത്ര താരം ദുല്ഖര്സല്മാനെ കാണാന് തിക്കിതിരക്കിയ ആള്ക്കൂട്ടത്തിനിടയില് നിന്നും കുഴഞ്ഞു വീണ് യുവാവ് മരിച്ചു .
തിരുവനന്തപുരം പ്രാവച്ചമ്പലം പറമ്പിക്കോണം വീട്ടില് ഹരി(45) യാണ് മരിച്ചത്. പരിക്കേറ്റ മറ്റു മുന്നുപേര് താലൂക്കാശുപത്രിയില് ചികിത്സ തേടി.
വെള്ളിയാഴ്ച നടന്ന കൊട്ടാരക്കര ഐമാള് വെഡ് വേള്ഡിന്റെ ഉദ്ഘാടനത്തിരക്കിനിടെ ആയിരുന്നു സംഭവം.
ഉദ്ഘാടകനായ ചലച്ചിത്ര താരം ദുല്ഖര്സല്മാനെ കാണാന് ജനം തിക്കിത്തിരിക്കിയതിനിടെ ഹരി കുഴഞ്ഞു വീഴുകയായിരുന്നു. ഉടന് കൊട്ടാരക്കര താലൂക്കാശുപത്രിയില് എത്തിച്ചുവെങ്കിലും മരിച്ചു. അസ്വാഭാവിക മരണത്തിന് പോലീസ് കേസ്സെടുത്തു.
രാവിലെ പതിനൊന്നോടെ ആയിരുന്നു സംഭവം. റോഡരികില് ആയിരങ്ങള് നിറഞ്ഞതോടെ എം.സി.റോഡില് ഗതാഗതം തടസ്സപ്പെട്ടു.
ബാരിക്കേഡും കടന്ന് വേദിയിലേക്കു ചാടിക്കയറാന് ശ്രമിച്ച ചിലരെ സ്വകാര്യ സെക്യുരിറ്റിക്കാര് മര്ദ്ദിച്ചതായും പരാതിയുണ്ട്. ഇത്തരത്തില് മര്ദ്ദനമേറ്റ പള്ളിമുക്ക് സ്വദേശി സുഹൈലി(22)നെ താലൂക്കാശുപത്രിയില് പ്രവേശിപ്പിച്ചു.
വേദിയില് നിന്നും കാവല്ക്കാര് തന്നെ മര്ദ്ദിച്ചു വലിച്ചെറിഞ്ഞതായി സുഹൈല് പറയുന്നു. ചിന്നു(20), രമ്യ(27) എന്നിവരാണ് താലൂക്കാശുപത്രിയില് ചികിത്സ തേടിയ മറ്റു രണ്ടു പേര്.
തിരക്കില് നിരവധി പേര്ക്ക് പരിക്കു പറ്റിയിട്ടുണ്ട്. ഗതാഗത തടസ്സം വരുത്തിയതിന് സംഘാടകര്ക്കെതിരെ കേസെടുത്തതായി എസ്.ഐ. സി.കെ.മനോജ് പറഞ്ഞു.