ലക്നോ: ഉത്തര്പ്രദേശില് മിശ്രവിവാഹം മുടക്കി പോലീസ്. ഹിന്ദു യുവതിയും മുസ്ലിം യുവാവും തമ്മിലുള്ള വിവാഹമാണ് യോഗി ആദിത്യനാഥ് സര്ക്കാരിന്റെ മതപരിവര്ത്തനം തടയല് നിയമ പ്രകാരം പോലീസ് തടഞ്ഞത്.ബുധനാഴ്ച ലക്നോവിലെ പരയിലാണ് വിവാഹം നടന്നത്. വിവാഹ ചടങ്ങ് ആരംഭിച്ച് ഏതാനും മിനിറ്റുകള്ക്കുള്ളില് പോലീസ് എത്തുകയും വിവാഹം തടയുകയും ചെയ്തു.
വധുവിന്റെയും വരന്റെയും ബന്ധുക്കളെ പോലീസ് സ്റ്റേഷനിലേക്ക് കൂട്ടിക്കൊണ്ടുപോകുകയും ചെയ്തു. ജില്ലാ കളക്ടറില്നിന്ന് മിശ്രവിവാഹത്തിനു അനുമതി വാങ്ങിയാല് മാത്രമേ ചടങ്ങ് നടത്താന് അനുവദിക്കൂ എന്ന നിലപാടിലായിരുന്നു പോലീസ്. ഇരു കുടുംബങ്ങളുടെയും സമ്മതത്തോടെയും അറിവോടെയുമാണ് വിവാഹം നടന്നത്.
ആവശ്യമായ നിയമപരമായ നടപടികള് പൂര്ത്തിയാക്കിയ ശേഷം ഇരു കുടുംബങ്ങളും വിവാഹവുമായി മുന്നോട്ട് പോകുമെന്നാണ് അറിയുന്നത്. മതപരിവര്ത്തനം നടത്താന് ഇരുകൂട്ടരും ഉദേശിച്ചിരുന്നില്ലെന്നും യുവാവിന്റെ കുടുംബം അറിയിച്ചു.