പാലാ : ഇന്ന് രാവിലെ കൊച്ചി ലേക് ഷോര് ആശുപത്രി ഇറക്കിയ പത്രക്കുറിപ്പിലും അതിനുശേഷം ഡോക്റ്റര് നടത്തിയ പത്രസമ്മേളനത്തിലും നല്കിയ വിവരം കെ എം മാണിയുടെ ആരോഗ്യനില സുരക്ഷിതം എന്നതായിരുന്നു.
ചെസ്റ്റ് ഇന്ഫക്ഷന് ആണ് നിലവില് മാണിസാറിനെ അലട്ടുന്നതെന്നും മരുന്നുകളോട് തൃപ്തികരമായ നിലവില് പ്രതികരിക്കുന്നുണ്ടെന്നുമായിരുന്നു ഡോക്റ്ററുടെ വിശദീകരണം.
പതിമൂന്നു വര്ഷമായി തുടരുന്ന ശ്വാസകോശ സംബന്ധമായ അസുഖങ്ങള്ക്കാണ് ചികിത്സ തുടരുന്നതെന്നും മറ്റെല്ലാ ആരോഗ്യ പരിശോധനകളും നോര്മല് ആണെന്നു൦ ഡോക്റ്റര് തന്നെ വിശദീകരിച്ചതാണ്.
മാണിസാറിന്റെ ആരോഗ്യനില തൃപ്തികരം എന്ന ധാരണയില് തന്നെയായിരുന്നു മകന് ജോസ് കെ മാണി എം പി കോട്ടയത്ത് തെരഞ്ഞെടുപ്പ് പ്രചാരണ പ്രവര്ത്തനങ്ങളില് മുഴുകിയത്. എന്നാല് ഉച്ച കഴിഞ്ഞതോടെ കാര്യങ്ങള് കുഴഞ്ഞുമറിഞ്ഞു.
പെട്ടെന്ന് പ്രഷര് ക്രമാതീതമായി താണുപോയി. അത് പിന്നെ ഉയര്ത്തിക്കൊണ്ടുവരാന് നടത്തിയ ശ്രമങ്ങള് വിജയിക്കാതെ വരികയായിരുന്നു. അദ്ദേഹം മരുന്നുകളോട് പ്രതികരിക്കാതെ വന്നു . ഉടന് തന്നെ കോട്ടയത്തുണ്ടായിരുന്ന മകന് ജോസ് കെ മാണിയെ വിവരം അറിയിക്കുകയും അദ്ദേഹം കൊച്ചിയിലേയ്ക്ക് തിരിക്കുകയും ചെയ്തു.
നാലേമുക്കാലോടെ ജോസ് കെ മാണി ആശുപത്രിയിലെത്തി . ഏതാനും മിനിട്ടുകള് മാത്രം കഴിയവേ 4.57 ന് കേരള രാഷ്ട്രീയം കണ്ട 'ഇതിഹാസ നായകന്' നിത്യതയിലേയ്ക്ക് യാത്രയായി. മരിക്കുമ്പോഴും ഭാര്യ കുട്ടിയമ്മയുടെ കൈകളില് മുറുകെപ്പിടിച്ച നിലയിലായിരുന്നു മാണിസാറിന്റെ കൈകള്.
എല്ലാ മക്കളും മരണസമയത്ത് മാണിസാറിനൊപ്പം ഉണ്ടായിരുന്നു. പിതാവിന്റെ ആരോഗ്യസ്ഥിതി മോശമാണെന്ന് പറയുമ്പോഴും പ്രചരിക്കുന്നതുപോലെ ഗുരുതരാവസ്ഥ ഇല്ലെന്ന വിശ്വാസത്തിലായിരുന്നു ജോസ് കെ മാണി. പ്രതിപക്ഷ നേതാവ്
രമേശ് ചെന്നിത്തല ഇന്നലെ പ്രചാരണ പരിപാടികള്ക്കായി കണ്ണൂര്ക്ക് തിരിക്കുംമുന്പ് മാണിസാറിന്റെ ആരോഗ്യനില അന്വേഷിക്കുകയും കണ്ണൂര് യാത്ര റദ്ദാക്കി കൊച്ചിയിലേയ്ക്ക് തിരിയ്ക്കാന് പ്ലാന് ചെയ്തതുമായിരുന്നു.
എന്നാല് അങ്ങനൊരു അടിയന്തിര സാഹചര്യം ഇല്ലെന്നും യാത്ര റദ്ദാക്കേണ്ടതില്ലെന്നും അറിയിച്ചത് ജോസ് കെ മാണിയായിരുന്നു അതിനാല് തന്നെയാണ് അദ്ദേഹം ആശുപത്രിയില് തുടരാതെ തോമസ് ചാഴികാടന്റെ തെരഞ്ഞെടുപ്പ് പ്രചാരണ പരിപാടികളില് മുഴുകിയത് .
രാവിലെ ഡോക്റ്റര്മാരുമായി സംസാരിച്ചപ്പോഴും ആശങ്കപ്പെടാന് ഒന്നുമില്ലെന്നായിരുന്നു മറുപടി . എന്നാല് പെട്ടെന്ന് കാര്യങ്ങള് തലകീഴായ് മറിഞ്ഞത് വിശ്വസിക്കാനാകാത്ത അവസ്ഥയിലായിരുന്നു ജോസ് കെ മാണി.