കൊച്ചി: പനമ്പിള്ളി നഗറില് ഫ്ലാറ്റിൽ നിന്നും അമ്മ താഴേക്ക് വലിച്ചെറിഞ്ഞ് കൊലപ്പെടുത്തിയ നവജാത ശിശുവിന്റെ മൃതദേഹം പുല്ലേപ്പടി ശ്മശാനത്തില് സംസ്കരിച്ചു. കൊച്ചി മേയര് എം അനില്കുമാര്, കൗണ്സിലര്മാര്, കൊച്ചിയിലെ പൊലീസ് ഉദ്യോഗസ്ഥന്മാര് തുടങ്ങിയവര് അന്തിമോപചാരം അര്പ്പിച്ചു.
കുഞ്ഞിന്റെ മൃതദേഹം അടക്കിയ ശവപ്പെട്ടിക്ക് ചുറ്റും പൊലീസ് ഉദ്യോഗസ്ഥര് പൂക്കള് കൊണ്ട് അലങ്കരിച്ചു. തുടര്ന്ന് സല്യൂട്ട് നല്കിയാണ് പൊലീസ് അന്ത്യാഞ്ജലി അര്പ്പിച്ചത്.
ശവപ്പെട്ടിക്ക് മുകളില് കളിപ്പാട്ടവും വെച്ചിരുന്നു. നവജാതശിശുവിന്റെ മൃതദേഹം കൊച്ചി കോര്പ്പറേഷന് ഏറ്റുവാങ്ങിയാണ് സംസ്കരിച്ചത്. പുല്ലേപ്പടി ശ്മശാനത്തിന് സമീപം ഒരുക്കിയ കുഴിയിലാണ് കുഞ്ഞിനെ അടക്കിയത്.