പൊന്നാനി: ഹജ്ജ് യാത്രയിലും പുണ്യസ്ഥലങ്ങളിലും വെച്ചുണ്ടാകുന്ന സൗഹൃദങ്ങളും ബന്ധങ്ങളും അതോടു കൂടി തീരുന്നില്ലെന്ന് അടയാളപ്പെടുത്തി പൊന്നാനിയിൽ അരങ്ങേറിയ ഹജ്ജാജി സംഗമം. 2019 വർഷം സംസ്ഥാന ഹജ്ജ് കമ്മിറ്റി മുഖേന വിശുദ്ധ തീർത്ഥാടനത്തിന് പോയവരാണ് പൊന്നാനിയിൽ ഒത്തുചേർന്നത്.
സംസ്ഥാന ഹജ്ജ് കമ്മിറ്റി അംഗവും പൊന്നാനി സ്വദേശിയുമായ ഉസ്താദ് കെ എം മുഹമ്മദ് ഖാസിം കോയയുടെ അധ്യക്ഷതയിൽ സമ്മേളിച്ച പുരുഷ വനിതാ ഹാജിമാർ പുണ്യയാത്രയിലും പുണ്യ കര്മാനുഷ്ഠാന വേളകളിലും പുണ്യ കേന്ദ്രങ്ങളിലും ഉണ്ടായ ധന്യമായ സ്മരണകളുടെ സുകൃതം നുകർന്നു. സംഗമം പൊന്നാനി മുനിസിപ്പൽ ചെയർമാൻ ശിവദാസ് ആറ്റുപുറം ഉദ്ഘാടനം ചെയ്തു.
നൗഷാദ് മാടതിങ്ങൽ, സൈദലവി ഫൈസി , ഇസ്മായിൽ അൻവറി, അബ്ദുറഹ്മാൻ ഹനീഫ, ഡോ. ഇല്യാസ്, കുഞ്ഞായാമു എന്നിവർ ആശംസ അറിയിച്ചു.
കൂടാതെ ഈ വർഷത്തെ ഹജ്ജ് അസിസ്റ്റന്റ് ആയി കേന്ദ്ര സർക്കാരിന് വേണ്ടി നിയമനം ലഭിച്ച നൗഷാദിനെ 2019 വർഷത്തെ ഹജ്ജാജി സംഗമം അനുമോദിക്കുകയും ഔപചാരികമായ യാത്രയും ഉത്തരവാദിത്ത നിർവഹണവും നേരുകയും ചെയ്തു. അതോടൊപ്പം, ഡോക്റ്ററേറ്റ് നേടിയ ഇല്യാസ് ഐജിയെയും സംഗമം ആദരിച്ചു