തിരുവനന്തപുരം: മാസപ്പടി കേസില് മുഖ്യമന്ത്രി പിണറായി വിജയന്, മകള് വീണാ വിജയന് എന്നിവര്ക്കെതിരെ അന്വേഷണം വേണമെന്നാവശ്യപ്പെട്ട് കോണ്ഗ്രസ് നേതാവ് മാത്യു കുഴല്നാടന് സമര്പ്പിച്ച ഹര്ജി തള്ളി. തിരുവനന്തപുരം വിജിലന്സ് കോടതിയാണ് ഹര്ജി തള്ളിയത്.
കഴിഞ്ഞ ദിവസം കേസ് പരിഗണിച്ചപ്പോള് അഞ്ച് രേഖകള് മാത്യു കുഴല്നാടന് കോടതിയില് നല്കിയിരുന്നു. മുഖ്യമന്ത്രിയുടെയും മകളുടെയും പങ്ക് തെളിയിക്കുന്ന രേഖകളാണ് ഇതെന്നായിരുന്നു മാത്യു കുഴല്നാടന്റെ വാദം.
സിഎംആര്എല്ലിന് വഴിവിട്ട സഹായം നല്കാന് മുഖ്യമന്ത്രി ഇടപെട്ടുവെന്നതിനു പര്യാപ്തമായ രേഖകളാണ് ഹാജരാക്കിയതെന്നും കുഴല്നാടന് അവകാശപ്പെട്ടിരുന്നു. കഴിഞ്ഞ ദിവസം കേസ് പരിഗണിച്ചപ്പോള് കുഴല്നാടന്റെ അഭിഭാഷകന് രേഖകള് കോടതിക്ക് കൈമാറുകയായിരുന്നു.