ബംഗളൂരു ഹോട്ടലിൽ വിദേശ വനിത മരിച്ച നിലയിൽ; കൊലപാതകമെന്ന് പൊലീസ്

ബെംഗളൂരു: ഉസ്ബെക്കിസ്ഥാനിൽ നിന്നുള്ള 37 കാരിയായ യുവതിയെ ബുധനാഴ്ച ബെംഗളൂരുവിലെ ഹോട്ടൽ മുറിയിൽ മരിച്ച നിലയിൽ കണ്ടെത്തി. മാർച്ച് അഞ്ചിന് ബംഗളൂരുവിൽ എത്തിയ സറീൻ നഗരത്തിലെ ശേഷാദ്രിപുരം പ്രദേശത്തെ ഒരു ഹോട്ടലിലായിരുന്നു താമസം.

വൈകിട്ട് നാലരയോടെ ഹോട്ടൽ ജീവനക്കാർ വാതിലിൽ മുട്ടിയെങ്കിലും പ്രതികരണമുണ്ടായില്ലെന്ന് പൊലീസ് പറഞ്ഞു. തുടർന്ന് മാസ്റ്റർ കീ ഉപയോഗിച്ച് വാതിൽ തുറന്ന ജീവനക്കാർ സറീനിനെ മരിച്ച നിലയിൽ കണ്ടെത്തുകയായിരുന്നു. 

സറീനെ ശ്വാസം മുട്ടിച്ചതാകാമെന്നും ബെംഗളൂരു സെൻട്രൽ ഡിസിപി ശേഖർ എച്ച്ടി പറഞ്ഞു. മൃതദേഹം പോസ്റ്റ്‌മോർട്ടത്തിനായി ബൗറിംഗ് ആശുപത്രിയിലേക്ക് അയച്ചതായും അദ്ദേഹം പറഞ്ഞു. "സറീനെ ഒരു ഹോട്ടലിലെ മുറിയിൽ മരിച്ച നിലയിൽ കണ്ടെത്തി. സറീനെ ശ്വാസം മുട്ടിച്ചിരിക്കാം. സംഭവസമയത്ത് അവൾ തനിച്ചായിരുന്നു," ഡിസിപി കൂട്ടിച്ചേർത്തു.

അന്വേഷണത്തിനായി ഫോറൻസിക് സംഘവും പോലീസും ഡോഗ് സ്ക്വാഡും സറീൻ്റെ മുറിയിലെത്തി. ഹോട്ടൽ മാനേജരുടെ പരാതിയുടെ അടിസ്ഥാനത്തിൽ ദുരൂഹ മരണത്തിന് കേസെടുത്തു. സിസിടിവി ദൃശ്യങ്ങളും ഹോട്ടൽ രജിസ്റ്ററും പോലീസ് പരിശോധിച്ചു.