എനിക്ക് ജയിക്കാൻ ആഗ്രഹമില്ല, തോൽക്കാൻ മാത്രം! തിരഞ്ഞെടുപ്പ് തോൽവികളിലൂടെ 'തിരഞ്ഞെടുപ്പ് രാജാവ്' പത്മരാജൻ സ്വന്തമാക്കിയത് റെക്കോഡ് നേട്ടം; മത്സരിച്ചത് 238 തവണ !

സേലം: സേലത്ത് നിന്നുള്ള ടയർ റിപ്പയർ ഷോപ്പ് ഉടമയും 'തിരഞ്ഞെടുപ്പ് രാജാവ്' എന്നറിയപ്പെടുന്ന കെ പത്മരാജൻ (65) വീണ്ടും തൻ്റെ സ്ഥാനാർത്ഥിത്വം ഉറപ്പിക്കുകയാണ്. ഇത്തവണ ധർമ്മപുരി മണ്ഡലത്തിലെ സ്ഥാനാർത്ഥിയാണ് ഇദ്ദേഹം എത്തുന്നത്. 

പഞ്ചായത്ത് തിരഞ്ഞെടുപ്പുകളും പ്രസിഡൻ്റ് തിരഞ്ഞെടുപ്പുകളും ഉൾപ്പെടെ 238 തവണ സ്ഥാനാർത്ഥിയായെങ്കിലും ഒരിക്കലും വിജയിച്ചിട്ടില്ലാത്ത പത്മരാജന് റെക്കോർഡാണുള്ളത്. 

നിരവധി തോൽവികൾ നേരിട്ടിട്ടും പത്മരാജൻ തളരാതെ തുടരുകയാണ്. അദ്ദേഹത്തിന് ലിംക ബുക്ക് ഓഫ് റെക്കോർഡ്സ്, ഏഷ്യ ബുക്ക് ഓഫ് റെക്കോർഡ്സ്, ഡൽഹി ബുക്ക് ഓഫ് റെക്കോർഡ്സ് എന്നിവയിൽ തിരഞ്ഞെടുപ്പ് ചരിത്രത്തിലെ ഏറ്റവും പരാജയപ്പെട്ട സ്ഥാനാർത്ഥി എന്ന അംഗീകാരം നേടി.

"അടൽ ബിഹാരി വാജ്‌പേയി, പിവി നരസിംഹറാവു, ജെ ജയലളിത, എം കരുണാനിധി, എ കെ ആൻ്റണി, വയലാർ രവി, ബി എസ് യെദ്യൂരപ്പ, എസ് ബംഗാരപ്പ, എസ് എം കൃഷ്ണ, വിജയ് മല്യ, സദാനന്ദ ഗൗഡ, അൻബുമണി രാമദാസ് എന്നിവർക്കെതിരെയാണ് ഇതുവരെ ഞാൻ മത്സരിച്ചത്.

രാഷ്ട്രപതി, ഉപരാഷ്ട്രപതി തെരഞ്ഞെടുപ്പുകളിൽ ഞാൻ ആറ് തവണ മത്സരിച്ചിട്ടുണ്ട്. എനിക്ക് ജയിക്കാൻ ആഗ്രഹമില്ല, തോൽക്കാൻ മാത്രം, നിങ്ങൾക്ക് ഒരു നിശ്ചിത സമയത്തേക്ക് മാത്രമേ വിജയം ആസ്വദിക്കാൻ കഴിയൂ, പക്ഷേ നിങ്ങൾക്ക് എന്നെന്നേക്കുമായി തോൽവി അനുഭവിക്കാൻ കഴിയും," അദ്ദേഹം പറഞ്ഞു.