ഇലക്ടറൽ ബോണ്ട്: ഡിഎംകെയ്ക്ക് സാൻ്റിയാഗോ മാർട്ടിൻ നൽകിയത് 509 കോടി; കണക്കുകൾ പുറത്ത്

ചെന്നൈ: രാഷ്ട്രീയ പാർട്ടികൾക്കുള്ള ഫണ്ടിംഗ് ടൂളായ ഇലക്ടറൽ ബോണ്ടുകൾ ഏറ്റവും കൂടുതൽ വാങ്ങുന്ന ഫ്യൂച്ചർ ഗെയിമിംഗ് ആൻഡ് ഹോട്ടൽ സർവീസസ് തമിഴ്‌നാട് ഭരണകക്ഷിയായ ദ്രാവിഡ മുന്നേറ്റ കഴകത്തിന് (ഡിഎംകെ) 509 കോടി രൂപ സംഭാവന നൽകി.

മുദ്രവച്ച കവറിൽ സുപ്രീം കോടതിയിൽ സമർപ്പിച്ച ഇലക്ടറൽ ബോണ്ടുകളുടെ കണക്കുകൾ തിരഞ്ഞെടുപ്പ് കമ്മീഷൻ പുറത്തുവിട്ടതിന് പിന്നാലെയാണ് ഇക്കാര്യം വെളിപ്പെടുത്തിയത്.

ഇലക്ടറൽ ബോണ്ടുകൾ വഴി ഡിഎംകെയ്ക്ക്  ആകെ 656.5 കോടി രൂപ ലഭിച്ചു. അതിൽ 77 ശതമാനവും (509 കോടി രൂപ) ലോട്ടറി രാജാവ് സാൻ്റിയാഗോ മാർട്ടിൻ്റെ ഫ്യൂച്ചർ ഗെയിമിംഗിൽ നിന്നാണ്.

തിരെഞ്ഞെടുപ്പ് കമ്മീഷൻ പങ്കിട്ട ഡാറ്റ അനുസരിച്ച് ഇലക്ടറൽ ബോണ്ടുകളുടെ ഏറ്റവും കൂടുതൽ വാങ്ങുന്നയാളാണ് ഫ്യൂച്ചർ ഗെയിമിംഗ്. 1,368 കോടി രൂപയുടെ ഇലക്ടറൽ ബോണ്ടുകൾ വാങ്ങിയതിൽ 37 ശതമാനവും തമിഴ്‌നാട് മുഖ്യമന്ത്രി എംകെ സ്റ്റാലിൻ്റെ പാർട്ടിക്കായിരുന്നു.

ഡിഎംകെയുടെ മറ്റ് പ്രധാന സംഭാവനകളിൽ മേഘ എഞ്ചിനീയറിംഗ് (105 കോടി രൂപ), ഇന്ത്യ സിമൻ്റ്‌സ് (14 കോടി രൂപ), സൺ ടിവി (100 കോടി രൂപ) എന്നിവ ഉൾപ്പെടുന്നുവെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്തു.

സംഭാവന നൽകുന്നവരുടെ വ്യക്തിവിവരങ്ങൾ വെളിപ്പെടുത്താൻ തീരുമാനിച്ച ചുരുക്കം ചില രാഷ്ട്രീയ പാർട്ടികളിൽ ഒന്നായി ഡിഎംകെ വേറിട്ടു നിന്നു.

ഇതിനു വിപരീതമായി, ബിജെപി, കോൺഗ്രസ്, ടിഎംസി, എഎപി തുടങ്ങിയ പ്രമുഖ പാർട്ടികൾ അത്തരം വിവരങ്ങൾ തിരഞ്ഞെടുപ്പ് കമ്മീഷനോട് വെളിപ്പെടുത്തുന്നതിൽ നിന്ന് വിട്ടുനിന്നു. എന്നാൽ, സുപ്രീം കോടതി ഉത്തരവിനെ തുടർന്ന് തിരഞ്ഞെടുപ്പ് കമ്മീഷൻ ഈ ഫയലുകൾ പരസ്യമാക്കിയിരിക്കുകയാണ്.

 2018 മുതൽ ബോണ്ടുകൾ വഴി ധനസഹായം സ്വീകരിക്കുന്ന പാർട്ടികളുടെ പട്ടികയിൽ 6,986.5 കോടി രൂപയുമായി ബിജെപിയാണ് മുന്നിൽ. 1,397 കോടിയുമായി മമതാ ബാനർജിയുടെ തൃണമൂൽ കോൺഗ്രസ് രണ്ടാമതും കോൺഗ്രസ് (1,334 കോടി രൂപ), ബിആർഎസ് (1,322 കോടി രൂപ) എന്നിവരും തൊട്ടുപിന്നിലുണ്ട്.