അനധികൃതമായി ബംഗ്ലാദേശിലേക്ക് കടന്നു, തമിഴ്നാട് പോലീസ് ഉദ്യോഗസ്ഥൻ കരുതൽ തടങ്കലിൽ

ചെന്നൈ: തമിഴ്‌നാട് സ്‌പെഷ്യൽ പോലീസ് സബ് ഇൻസ്‌പെക്ടർ ബംഗ്ലാദേശിലേക്ക് അനധികൃതമായി നുഴഞ്ഞു കയറിയതായി റിപ്പോർട്ട്. അനധികൃതമായി കയറിയ ഉദ്യോഗസ്ഥനെ കസ്റ്റഡിയിലെടുത്തെന്നുമാണ് വിവരം. 

താംബരം കമ്മീഷണറേറ്റിന് കീഴിലുള്ള സേലയൂർ പോലീസ് സ്‌റ്റേഷനിൽ 47 കാരനായ എസ്എസ്ഐ ജോൺ സെൽവരാജ് ദിവസങ്ങൾക്ക് മുമ്പ് മെഡിക്കൽ ലീവ് എടുത്താണ് സ്റ്റേഷനിൽ നിന്ന് ഇറങ്ങുന്നത്. എന്നാൽ ഇതിന് ശേഷം അദ്ദേഹം എവിടെയായിരുന്നു എന്നത് സംബന്ധിച്ച് വിവരങ്ങൾ ലഭിച്ചിരുന്നില്ലെന്നും തമിഴ്നാട് പോലീസ് പറയുന്നു. 

"ബംഗ്ലാദേശിൽ പിടിക്കപ്പെട്ടു എന്നത് സംബന്ധിച്ച് ഔദ്യോഗിക റിപ്പോർട്ടുകളൊന്നും ഇതുവരെ ലഭിച്ചിട്ടില്ല. ബംഗ്ലാദേശിലേക്ക് അദ്ദേഹം ഒളിച്ചോടിയെന്നും, ഇതിൻ്റെ ഫലമായി അധികാരികൾ അവിടെ തടഞ്ഞുവച്ചിരിക്കുകയാണെന്നും അവകാശപ്പെടുന്ന അനൗദ്യോഗിക വിവരങ്ങൾ മാത്രമാണ് ഞങ്ങൾക്ക് ലഭിച്ചത്," ഉദ്യോഗസ്ഥർ വ്യക്തമാക്കി.

2021ൽ ചെന്നൈ പോലീസ് കമ്മീഷണറേറ്റ് വിഭജിച്ചതിനെ തുടർന്നാണ് സെൽവരാജിനെ താംബരം കമ്മീഷണറേറ്റിലേക്ക് നിയമിച്ചത്. സെൽവരാജ് എന്തിനാണ് ബംഗ്ലാദേശിലേയ്ക്ക് പോയതെന്ന് ഇപ്പോഴും വ്യക്തമല്ല.