'ഉറങ്ങാനുള്ള അവകാശം മനുഷ്യൻ്റെ അടിസ്ഥാന ആവശ്യം, അത് ലംഘിക്കാനാവില്ല; രാത്രിയിലും ഉറങ്ങുന്ന സമയത്തും മൊഴി രേഖപ്പെടുത്തരുത്; എൻഫോഴ്സ്മെൻ്റ് ഡയറക്ടറേറ്റിനെ ശാസിച്ച് ബോംബെ ഹൈക്കോടതി

മുംബൈ: കള്ളപ്പണം വെളുപ്പിക്കൽ കേസിൽ ഒരു മുതിർന്ന പൗരനെ ഒറ്റ രാത്രികൊണ്ട് ചോദ്യം ചെയ്തതിൽ എൻഫോഴ്സ്മെൻ്റ് ഡയറക്ടറേറ്റിനെ ശാസിച്ച് ബോംബെ ഹൈക്കോടതി. ഉറങ്ങാനുള്ള അവകാശം മനുഷ്യൻ്റെ അടിസ്ഥാന ആവശ്യമാണെന്നും അത് ലംഘിക്കാനാവില്ലെന്നും കോടതി പറഞ്ഞു.

രാത്രിയിലും ഉറങ്ങുന്ന സമയത്തും മൊഴി രേഖപ്പെടുത്തരുതെന്ന് ജസ്റ്റിസ് രേവതി മൊഹിതേ ദേരെ, ജസ്റ്റിസ് മഞ്ജുഷ ദേശ്പാണ്ഡെ എന്നിവരടങ്ങിയ ഡിവിഷൻ ബെഞ്ച് നിർദ്ദേശിച്ചു.

കള്ളപ്പണം വെളുപ്പിക്കൽ കേസിലെ  അറസ്റ്റിനെ ചോദ്യം ചെയ്ത 64 കാരനായ രാം ഇസ്രാനിയുടെ ഹർജിയിലാണ് കോടതി ഉത്തരവിട്ടത്. 2023 ഓഗസ്റ്റിലാണ് ഇഡി ഇസ്രാനിയെ അറസ്റ്റ് ചെയ്തത്.

രാത്രി മുഴുവൻ ചോദ്യം ചെയ്യുന്നത് ശരിയല്ല

2023 ആഗസ്ത് 7 ന് നൽകിയ സമൻസ് പ്രകാരം താൻ ഏജൻസിക്ക് മുമ്പാകെ ഹാജരാകിയെന്നും രാത്രി മുഴുവൻ ചോദ്യം ചെയ്തെന്നും ഇസ്രാനി ഹർജിയിൽ പറഞ്ഞു. പിറ്റേന്ന് കേസിൽ അറസ്റ്റ് രേഖപ്പെടുത്തി. ഹർജി തള്ളിയെങ്കിലും ഹർജിക്കാരനെ ഒറ്റരാത്രികൊണ്ട് ചോദ്യം ചെയ്യുന്ന രീതി ശരിയല്ലെന്ന് ബെഞ്ച് പറഞ്ഞു.

അതേസമയം രാത്രിയിൽ മൊഴി രേഖപ്പെടുത്താൻ ഇസ്രാനി സമ്മതം നൽകിയിരുന്നതായി അന്വേഷണ ഏജൻസിയുടെ അഭിഭാഷകൻ ഹിറ്റെൻ വെനേഗാവ്കർ കോടതിയെ അറിയിച്ചു.

ഹർജി പ്രകാരം ഇഡി ഉദ്യോഗസ്ഥർ ഇസ്രാനിയെ പുലർച്ചെ വരെ ചോദ്യം ചെയ്തു. സ്വമേധയാ ആണെങ്കിലും അല്ലെങ്കിലും പുലർച്ചെ 3.30 വരെ ഹർജിക്കാരൻ്റെ മൊഴി രേഖപ്പെടുത്തിയ രീതി അപലപനീയമാണെന്ന് കോടതി പറഞ്ഞു.

ഉറങ്ങാനുള്ള അവകാശം മനുഷ്യൻ്റെ അടിസ്ഥാന ആവശ്യമാണെന്നും അത് ഇല്ലാതാക്കുന്നത് ഒരു വ്യക്തിയുടെ മനുഷ്യാവകാശ ലംഘനമാണെന്നും അതിൽ പറയുന്നു.

സമൻസ് പുറപ്പെടുവിക്കുമ്പോൾ മൊഴി രേഖപ്പെടുത്തേണ്ട സമയം സംബന്ധിച്ച് സർക്കുലർ പുറപ്പെടുവിക്കാൻ ഇഡിയോട് നിർദ്ദേശിക്കുന്നത് ഉചിതമാണെന്ന് കോടതി പറഞ്ഞു. വിഷയം സെപ്‌റ്റംബർ 9-ലേക്ക് പരിഗണിക്കുന്നതിനായി ബെഞ്ച് ലിസ്‌റ്റ് ചെയ്‌തു.