മന്ത്രവാദം; മഹാരാഷ്ട്രയിൽ 2 പേരെ ജീവനോടെ കത്തിച്ചു കൊന്നു; 15 പേർ അറസ്റ്റിൽ

മുംബെെ: മഹാരാഷ്ട്രയിലെ ഗഡ്ചിരോലി ജില്ലയിൽ  മന്ത്രവാദത്തിൻ്റെ പേരിൽ ഒരു സ്ത്രീ ഉൾപ്പെടെ രണ്ടുപേരെ ആളുകൾ ആക്രമിച്ച് ജീവനോടെ ചുട്ടുകൊന്നു. സംഭവവുമായി ബന്ധപ്പെട്ട് 15 പേരെ അറസ്റ്റ് ചെയ്തു.

മേയ് ഒന്നിന് ഗ്രാമത്തിലെ ചിലർ ഒത്തുചേർന്ന് പഞ്ചായത്ത് വിളിക്കുകയും ഇരകളായ രണ്ടുപേരും മന്ത്രവാദത്തിൽ ഏർപ്പെട്ടിരിക്കുകയാണെന്ന് ആരോപിച്ചു. മൂന്നര വയസ്സുള്ള ആരോഹി ബന്ദു തെലാമി എന്ന കുട്ടി മന്ത്രവാദം മൂലമാണ് മരിച്ചതെന്നും ഗ്രാമവാസികൾ ആരോപിച്ചു.

കുട്ടിയുടെ മരണത്തിൽ രോഷാകുലരായ ഗ്രാമവാസികൾ ഇരകളെ പിടികൂടുകയും മർദിക്കുകയും പെട്രോളൊഴിച്ച് തീകൊളുത്തുകയും ചെയ്തു. ജമ്‌നി ദേവാജി തെലാമി (52), ദേശു കടിയ അറ്റ്‌ലാമി (57) എന്നിവരാണ് കൊല്ലപ്പെട്ടത്.

സംഭവത്തിൻ്റെ ഗൗരവവും തീവ്രതയും കണക്കിലെടുത്ത് പോലീസ് സൂപ്രണ്ട് (എസ്പി) ഗഡ്ചിരോളി നിലോത്പാൽ അന്വേഷണം ആരംഭിച്ച് പ്രതികളെ അറസ്റ്റ് ചെയ്യാൻ പോലീസിന് നിർദ്ദേശം നൽകി.

അന്വേഷണത്തിൽ പതിനഞ്ച് പേരെ പോലീസ് അറസ്റ്റ് ചെയ്തു. അജയ് ബാപ്പു തെലാമി, ഭൗജി ശത്രു തെലാമി, അമിത് സമ മദവി, മിർച്ചാ തെലാമി, ബാപ്പു കാന്ദ്രു തെലാമി, സോംജി കാന്ദ്രു തെലാമി, ദിനേഷ് കൊലു തെലാമി, ശ്രീഹരി ബിർജ തെലാമി, മധുകർ ദേശു, അമിത് എന്ന നാഗേഷ് റാംജി തെലാമി, മധുകർ ബാജു ഹേദോ, ഗണേഷ് ബാജു ഹേദോ, എന്നിവരെയാണ് അറസ്റ്റ് ചെയ്തത്.