ഓഗസ്‌റ്റിൽ 74 ലക്ഷം ഇന്ത്യൻ അക്കൗണ്ടുകൾ നിരോധിച്ച് വാട്‌സ്ആപ്പ്

ഓഗസ്‌റ്റ് മാസം 74 ലക്ഷത്തിലധികം ഇന്ത്യൻ ഉപയോക്താക്കളെ പ്ലാറ്റ്‌ഫോമിൽ നിന്ന് നിരോധിച്ച് വാട്‌സ്ആപ്പ്. ഇൻഫർമേഷൻ ടെക്‌നോളജി റൂൾസ്, 2021 അനുസരിച്ച് അതിന്റെ ഏറ്റവും പുതിയ പ്രതിമാസ റിപ്പോർട്ടിൽ, ഇന്ത്യൻ ഉപയോക്താക്കളിൽ നിന്നുള്ള പരാതികൾ, അക്കൗണ്ട് ലംഘനങ്ങൾ, പരാതി അപ്പീലിൽ നിന്നുള്ള ഉത്തരവുകൾ എന്നിവയ്ക്ക് മറുപടിയായാണ് കമ്പനി സ്വീകരിച്ച നടപടികൾ പ്ലാറ്റ്‌ഫോം വെളിപ്പെടുത്തിയത്. 

റിപ്പോർട്ട് അനുസരിച്ച്, ഓഗസ്‌റ്റ് 1നും 31നും ഇടയിൽ 7,420,748 ഇന്ത്യൻ അക്കൗണ്ടുകൾ വാട്ട്‌സ്ആപ്പ് നിരോധിച്ചു. ഇതിൽ തന്നെ മെറ്റയുടെ ഉടമസ്ഥതയിലുള്ള പ്ലാറ്റ്‌ഫോം ഉപയോക്താക്കളുടെ റിപ്പോർട്ടുകൾക്കായി കാത്തുനിൽക്കാതെ 3,506,905 ഇന്ത്യൻ അക്കൗണ്ടുകൾ മുൻ‌കൂട്ടി നിരോധിച്ചു. നിയമങ്ങൾ ലംഘിക്കാൻ സാധ്യതയുള്ള അക്കൗണ്ടുകൾ തിരിച്ചറിഞ്ഞാണ് വാട്‌സ്ആപ്പ് ഈ മുൻകരുതൽ നടപടി സ്വീകരിച്ചത്. ഉപയോക്താക്കൾ റിപ്പോർട്ട് ചെയ്യുന്ന നിയമ ലംഘനങ്ങളെ മാത്രം ആശ്രയിക്കാതെ പ്ലാറ്റ്‌ഫോമിന്റെ സുരക്ഷയും സമഗ്രതയും ഉറപ്പാക്കാനാണ് ഈ നടപടി.

കൂടാതെ, പ്ലാറ്റ്‌ഫോമിന് 14,767 പരാതി റിപ്പോർട്ടുകളും ലഭിച്ചു. അതിൽ നിന്ന് 17 അക്കൗണ്ടുകൾക്കെതിരെ നടപടിയെടുത്തു. ഉപയോക്തൃ പരാതികൾ പരിഗണിക്കുകയും പ്ലാറ്റ്‌ഫോമിലെ മോശം പെരുമാറ്റം തടയാൻ മുൻകൈ എടുക്കുകയും ചെയ്യുന്ന വാട്ട്‌സ്ആപ്പ്, പ്ലാറ്റ്‌ഫോമിന്റെ ദുരുപയോഗവും സ്‌പാമും എങ്ങനെ കൈകാര്യം ചെയ്യുന്നുവെന്നും റിപ്പോർട്ടിൽ വിശദമാക്കുന്നു.