'ഡൽഹിയിൽ രാഷ്ട്രപതി ഭരണം ഏർപ്പെടുത്താനുള്ള ഗൂഢാലോചന' - ഡൽഹി മന്ത്രി അതിഷി

ഡൽഹി:ദേശീയ തലസ്ഥാനത്ത് രാഷ്ട്രപതി ഭരണം ഏർപ്പെടുത്താൻ ബിജെപി നേതൃത്വത്തിലുള്ള കേന്ദ്ര സർക്കാർ വലിയ രാഷ്ട്രീയ ഗൂഢാലോചന നടത്തുകയാണെന്ന് ഡൽഹി മന്ത്രി അതിഷി  ആരോപിച്ചു.

ഡൽഹിയിൽ രാഷ്ട്രപതി ഭരണം ഏർപ്പെടുത്താൻ ബിജെപി ഗൂഢാലോചന നടത്തുകയാണെന്ന് ഞങ്ങളുടെ വിശ്വസ്ത വൃത്തങ്ങൾ പറഞ്ഞതായി അറിഞ്ഞുവെന്നും മന്ത്രി പറഞ്ഞു. രാഷ്ട്രപതി ഭരണം ഏർപ്പെടുത്തിയാൽ സംസ്ഥാനത്തിൻ്റെ ഭരണം കേന്ദ്രസർക്കാർ ഏറ്റെടുക്കും.

ഡൽഹി നിയമസഭയിൽ ആം ആദ്മി പാർട്ടി (എഎപി) സർക്കാർ ഭൂരിപക്ഷം തെളിയിച്ചതിനാൽ ഡൽഹിയിൽ രാഷ്ട്രപതി ഭരണം ഏർപ്പെടുത്തുന്നത് നിയമവിരുദ്ധവും ജനങ്ങളുടെ ഉത്തരവിന് വിരുദ്ധവുമായിരിക്കും.” അതിഷി കൂട്ടിച്ചേർത്തു.

സ്ത്രീകൾക്ക് പ്രതിമാസം 1000 രൂപ നൽകുന്ന പാർട്ടിയുടെ പരിപാടി തടയാനാണ് എഎപി മേധാവി അരവിന്ദ് കേജ്രിവാളിനെ എൻഫോഴ്‌സ്‌മെൻ്റ് ഡയറക്‌ടറേറ്റ് "വ്യാജ ആരോപണങ്ങളുടെ അടിസ്ഥാനത്തിൽ" അറസ്റ്റ് ചെയ്തതെന്നും അതിഷി പത്രസമ്മേളനത്തിൽ പറഞ്ഞു.

നിരവധി തസ്തികകൾ ഒഴിഞ്ഞുകിടന്നിട്ടും നഗരത്തിലെ സർക്കാരിൽ ഉദ്യോഗസ്ഥരെ നിയമിക്കാതെ കേന്ദ്രസർക്കാർ ഡൽഹിയുടെ ഭരണത്തെ വലയ്ക്കുകയാണെന്നും യോഗത്തിൽ അതിഷി ആരോപിച്ചു.

വകുപ്പുകളിൽ തസ്‌തികകൾ ഒഴിഞ്ഞുകിടക്കുന്നുണ്ടെങ്കിലും നിയമനങ്ങളൊന്നും നടന്നിട്ടില്ല. മാതൃകാ പെരുമാറ്റച്ചട്ടം ചൂണ്ടിക്കാട്ടി മന്ത്രിമാർ വിളിച്ച യോഗങ്ങളിൽ ഉദ്യോഗസ്ഥർ പങ്കെടുക്കുന്നത് നിർത്തി. ഡൽഹി സർക്കാരിൻ്റെ പ്രവർത്തനത്തെ കുറിച്ച് ലഫ്റ്റനൻ്റ് ഗവർണർ കേന്ദ്ര ആഭ്യന്തര മന്ത്രാലയത്തിന് കത്തെഴുതുന്നുണ്ട്." അവർ കുറ്റപ്പെടുത്തി.