ബംഗളുരു: ബംഗളുരു ചെല്ലക്കരയില് സ്വകാര്യ സ്കൂള് കെട്ടിടത്തിനു മുകളില്നിന്നും വീണ് നാലുവയസുകാരിയായ മലയാളി വിദ്യാര്ത്ഥിനിയുടെ നില ഗുരുതരമായി തുടരുന്നു. നിലവില് വെന്റിലേറ്ററിന്റെ സഹായത്തോടെയാണ് കുട്ടി കഴിയുന്നത്.
കോട്ടയം മണിമല സ്വദേശി ജിന്റോ ടോമി ജോസഫിന്റെ മകള് ജിയന ആന് ജിജോയ്ക്കാണ് ഗുരുതര പരിക്കേറ്റത്. സ്കൂള് അധികൃതരുടെ അലംഭാവമാണ് അപകടത്തിന് ഇടയാക്കിയതെന്ന് കുടുംബം ആരോപിച്ചു. സംഭവത്തില് അന്വേഷണം ആവശ്യപ്പെട്ട് മാതാപിതാക്കള് മുഖ്യമന്ത്രി, വിദ്യാഭ്യാസ മന്ത്രി എന്നിവര്ക്ക് പരാതി നല്കി.
തിങ്കളാഴ്ച ഉച്ചയ്ക്ക് ഹെന്നൂര് ചലിക്കരെ ഡല്ഹി പ്രീ സ്കൂളില് കളിക്കുന്നതിനിടെ കുട്ടി ചുമരില് തലയടിച്ച് വീണെന്നാണ് സ്കൂള് അധികൃതര് മാതാപിതാക്കളെ അറിയിച്ചത്. എന്നാല്, ഉയരത്തില് നിന്ന് വീണപ്പോഴുള്ള മാരകമായ പരുക്കുകളാണ് കുട്ടിയുടെ ദേഹത്തുള്ളതെന്ന് ഡോക്ടര്മാര് പറഞ്ഞതായി ബന്ധുക്കള് പറഞ്ഞു. രണ്ടാം നിലയിലെ ടെറസില് നിന്ന് താഴേക്ക് വീണതായി സംശയിക്കുന്നെന്നും പരാതിയയുണ്ട്.
സംഭവത്തില് രണ്ട് ആയമാരെ പൊലീസ് ചോദ്യം ചെയ്ത് വരികയാണ്. അതേസമയം, സംഭവത്തില് സ്കൂള് അധികൃതര്ക്കെതിരെ വിമര്ശനവുമായി ജിയന്ന ആന് ജിജോയുടെ കുടുംബം രംഗത്തെത്തി. സ്കൂള് അധികൃതരുടെ അലംഭാവമാണ് അപകടത്തിന് ഇടയാക്കിയതെന്ന് കുടുംബം ആരോപിച്ചു. കുട്ടികളെ നോക്കാന് രണ്ട് ആയമാരുണ്ടായിരുന്നിട്ടും കുട്ടി എങ്ങനെയാണ് കെട്ടിടത്തിന് മുകളിലെത്തിയതെന്നാണ് കുടുംബത്തിന്റെ സംശയം.
കെട്ടിടത്തിന് മുകളില് നിന്ന് കുട്ടി വീണിട്ടും അടുത്തുള്ള ക്ലിനിക്കില് മാത്രമാണ് കുട്ടിയെ എത്തിച്ചത്. തലയ്ക്ക് ഗുരുതര പരിക്കേറ്റിട്ടും കുട്ടിയെ ആശുപത്രിയില് എത്തിച്ചില്ലെന്നും വീട്ടുകാര് ഇടപെട്ട് എത്തിക്കുമ്പോഴേക്കും കുട്ടിയുടെ ആരോഗ്യനില വഷളായെന്നും കുടുംബം പറയുന്നു.