സ്പീക്കർ ബോക്സ് തലയിൽ വീണ് ആറ് വയസുകാരന് ദാരുണാന്ത്യം

ഡല്‍ഹി: ഝാർഖണ്ഡിലെ വെസ്റ്റ് സിംഗ്ഭും ജില്ലയിൽ ഹോളി ആഘോഷത്തിനിടെ സ്പീക്കർ ബോക്സ് വീണ് ആറ് വയസുകാരൻ മരിച്ചു. ചക്രധർപൂരിൽ നിന്നുള്ള സുരേഷ് ലോഹറിൻ്റെ മകൻ വിഷ്ണു ലോഹറാണ് മരിച്ചത്. 

തിങ്കളാഴ്ച ഗ്രാമത്തിൽ നടന്ന ഹോളി ആഘോഷങ്ങളിൽ പങ്കെടുക്കാൻ പോയിരുന്നതാണ് സുരേഷിൻ്റെ കുടുംബം. എന്നാൽ പരിപാടികൾക്കായി അവിടെ എത്തിച്ച സ്പീക്കറാണ് പിന്നീട് മകൻ്റെ ജീവനെടുക്കുന്നത്. 

ആഘോഷങ്ങൾക്കിടെ സമീപത്ത് സൂക്ഷിച്ചിരുന്ന സ്പീക്കർ ബോക്സ് വിഷ്ണുവിൻ്റെ മേൽ വീഴുകയായിരുന്നു. തലയ്ക്ക് ഗുരുതരമായ പരിക്കാണ് ഏറ്റത്.

കുട്ടിയെ ഉടൻ തന്നെ സബ് ഡിവിഷണൽ ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു.  സംഭവത്തിൽ ചക്രധർ പോലീസ് കേസെടുത്ത് കൂടുതൽ അന്വേഷണം നടത്തിവരികയാണ്.