അവള്‍ എനിക്ക്‌ മകളെപ്പോലെ, മകളെ ചുംബിക്കുന്നതിൽ തെറ്റില്ല; പ്രചാരണത്തിനിടെ സ്ത്രീയെ ചുംബിച്ച് ബിജെപി സ്ഥാനാർത്ഥി; ചിത്രം വൈറലായതോടെ വിവാദവും

ഡല്‍ഹി: ബിജെപി എംപി ഖാഗൻ മുർമുവും ബംഗാളിലെ നോർത്ത് മാൾഡ മണ്ഡലത്തിലെ പാർട്ടിയുടെ ലോക്‌സഭാ സ്ഥാനാർത്ഥിയും പ്രചാരണത്തിനിടെ ഒരു സ്ത്രീയുടെ കവിളിൽ ചുംബിക്കുന്ന ചിത്രം വൈറലാകുന്നു.

തിങ്കളാഴ്ച ബിജെപി സ്ഥാനാർത്ഥി തൻ്റെ പാർലമെൻ്റ് മണ്ഡലത്തിലെ ചഞ്ചലിലെ ശ്രീഹിപൂർ ഗ്രാമത്തിൽ പ്രചാരണം നടത്തുന്നതിനിടെയാണ് സംഭവം. ഖാഗൻ മുർമു സ്ത്രീയെ ചുംബിക്കുന്ന ചിത്രങ്ങൾ സോഷ്യൽ മീഡിയയിൽ വ്യാപകമായി ഷെയർ ചെയ്യപ്പെട്ടിരുന്നു. ഇതോടെ തൃണമൂൽ കോൺഗ്രസ് ബിജെപിക്കെതിരെ ആഞ്ഞടിച്ചു. 

"നിങ്ങൾക്ക് ഇപ്പോൾ കണ്ടത് വിശ്വസിക്കാൻ കഴിയുന്നില്ലെങ്കിൽ, ഞങ്ങൾ വ്യക്തമാക്കാം. അതെ, ഇത് ബിജെപി എംപിയും മാൽദാഹ ഉത്തർ സ്ഥാനാർത്ഥിയുമായ ഖഗെൻ മുർമു ആണ. തൻ്റെ പ്രചാരണ പാതയിൽ സ്വന്തം ഇഷ്ടപ്രകാരം ഒരു സ്ത്രീയെ ചുംബിക്കുന്നു.

വനിതാ ഗുസ്തിക്കാരെ ലൈംഗികമായി ഉപദ്രവിക്കുന്ന എംപിമാർ മുതൽ നേതാക്കൾ വരെ. ബിജെപി ക്യാമ്പിൽ സ്ത്രീ വിരുദ്ധ രാഷ്ട്രീയക്കാരുടെ ക്ഷാമമില്ല. ഇങ്ങനെയാണ് മോദി കാ പരിവാർ നാരി കാ സമ്മാനിൽ ഏർപ്പെടുന്നത്! അവർ അധികാരത്തിൽ വന്നാൽ എന്തുചെയ്യുമെന്ന് സങ്കൽപ്പിക്കുക." തൃണമൂൽ കോൺഗ്രസ് എക്സിൽ കുറിച്ചു.

 എന്നാൽ വിമർശനങ്ങൾക്കെതിരെ ഖഗെൻ മുർമു രംഗത്തെത്തിയിരുന്നു. സ്ത്രീ "തൻ്റെ കുട്ടിയെ" പോലെയാണെന്ന വാദമാണ് അദ്ദേഹം മറുപടിയായി നിരത്തിയത്.

 "ഒരു കുട്ടിയെ ചുംബിക്കുന്നതിൽ തെറ്റില്ല. ഇത് തികച്ചും ഗൂഢാലോചനയാണ്. അവർക്ക് അത്ര മോശം മൂല്യങ്ങളാണുള്ളത്," ബിജെപി സ്ഥാനാർത്ഥി പറഞ്ഞു.