പട്യാല: ജന്മദിനാഘാഷത്തിനിടെ 10 വയസുകാരിയ്ക്ക് ദാരുണാന്ത്യം. പഞ്ചാബിലെ പട്യാലയിൽ പിറന്നാൾ കേക്ക് കഴിച്ചതിനെ തുടർന്നാണ് പെണ്കുട്ടി മരിച്ചത്. ഭക്ഷ്യവിഷബാധയേറ്റതായി കുടുംബം ആരോപിക്കുന്നു.
ഓൺലൈനിൽ ഓർഡർ ചെയ്ത കേക്ക് കഴിച്ചതിന് പിന്നാലെ മാൻവിയ്ക്കും സഹോദരിയ്ക്കും രാത്രി ദേഹാസ്വാസ്ഥ്യം അനുഭവപ്പെട്ടതായി വീട്ടുകാർ പറയുന്നു. തുടർന്ന് പുലർച്ചെ മൂന്ന് മണിയോടെ കുട്ടികൾക്ക് ഛർദ്ദി തുടങ്ങിയെന്നും ഇവരെ അടുത്തുള്ള ആശുപത്രിയിൽ പ്രവേശിപ്പിച്ചതായും മാൻവിയുടെ മുത്തച്ഛൻ പറഞ്ഞു.
ആശുപത്രിയിലെത്തിച്ചപ്പോൾ മാൻവി മരിച്ചതായാണ് ഡോക്ടർമാർ അറിയിച്ചത്. ഇളയ സഹോദരി ഛർദ്ദിച്ചതു കൊണ്ടാകാം രക്ഷപ്പെട്ടതെന്നും വീട്ടുകാർ പറഞ്ഞു.
പിറന്നാൾ ആഘോഷങ്ങളുടെ വീഡിയോയിൽ പെൺകുട്ടിക്ക് കുടുംബാംഗങ്ങൾ കേക്ക് നൽകുന്നതിൻ്റെ ദൃശ്യങ്ങൾ പുറത്തുവന്നിരുന്നു. കേക്ക് ഉണ്ടാക്കിയവർക്കെതിരെ ആരോഗ്യവകുപ്പ് നടപടിയെടുക്കണമെന്ന് കുടുംബം ആവശ്യപ്പെട്ടിട്ടുണ്ട്.