ന്യൂഡല്ഹി: ഇന്ത്യാ സഖ്യം അധികാരത്തിലെത്തിയാല് ഓരോ വര്ഷവും ഓരോ പ്രധാനമന്ത്രിമാര് രാജ്യത്തുണ്ടാകുമെന്ന് പ്രധാനമന്ത്രി നരേന്ദ്ര മോദി. മധ്യപ്രദേശിലെ ബേതുളിൽ ഒരു പൊതുയോഗത്തെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അദ്ദേഹം. പ്രതിപക്ഷസഖ്യത്തിന് ഒരു പ്രധാനമന്ത്രി മുഖത്തെ അവതരിപ്പിക്കാനാകുന്നില്ലെന്ന് മോദി വിമര്ശിച്ചു.
'തങ്ങളുടെ പ്രധാനമന്ത്രി ആരാണെന്ന് രാജ്യം അറിയണം. ഞങ്ങളുടെ ഭാഗത്ത്, 10 വർഷത്തെ ട്രാക്ക് റിപ്പോർട്ടുമായി മോദി നിങ്ങളുടെ മുന്നിലുണ്ട്. പ്രതിപക്ഷം പ്രധാനമന്ത്രിയുടെ മുഖത്തിനായി ഒരാളെ തിരഞ്ഞെങ്കിലും കണ്ടെത്താനായില്ല. അഞ്ച് വർഷത്തിനുള്ളിൽ അഞ്ച് പ്രധാനമന്ത്രിമാർ ഓരോ വര്ഷവും ഓരോ പ്രധാനമന്ത്രി എന്ന സമവാക്യമാണ് അവര് ചര്ച്ച ചെയ്യുന്നതെന്ന് ചില മാധ്യമങ്ങൾ റിപ്പോർട്ട് ചെയ്യുന്നു. രാജ്യത്തിന് എന്ത് സംഭവിക്കും ?" മോദി ചോദിച്ചു.
"ഇതിനർത്ഥം അവർ ഇപ്പോൾ പ്രധാനമന്ത്രിയുടെ കസേര ലേലം ചെയ്യുന്നു എന്നാണ്. ഒരാൾ കസേരയിൽ ഇരിക്കും. അദ്ദേഹത്തിൻ്റെ കാലാവധി അവസാനിക്കാൻ മറ്റ് നാല് പേർ കാത്തിരിക്കും. ഇത് പകൽ സ്വപ്നം പോലെ തോന്നുന്നു. രാജ്യത്തെ നശിപ്പിക്കുന്ന വളരെ ഭയാനകമായ നിർദ്ദേശമാണിത്. ഇത് നിങ്ങളുടെ എല്ലാ സ്വപ്നങ്ങളും തകർക്കും," മോദി പറഞ്ഞു.