ബംഗാൾ ഗവർണർക്കെതിരായ പീഡനക്കേസ്: അന്വേഷിക്കാൻ കൊൽക്കത്ത പോലീസിൻ്റെ പ്രത്യേക സംഘം

കൊൽക്കത്ത: പശ്ചിമ ബംഗാൾ ഗവർണർ സിവി ആനന്ദ ബോസിനെതിരെ രാജ്ഭവനിലെ ഒരു വനിതാ ജീവനക്കാരി ഉന്നയിച്ച പീഡനം സംബന്ധിച്ച ആരോപണങ്ങൾ അന്വേഷിക്കാൻ കൊൽക്കത്ത പോലീസ് പ്രത്യേക എൻക്വിറ്റി ടീമിനെ രൂപീകരിച്ചു.

ഡിസി (സെൻട്രൽ) ഇന്ദിരാ മുഖർജിയുടെ നേതൃത്വത്തിലുള്ള പ്രത്യേക സംഘം സംഭവത്തിൽ അന്വേഷണം ആരംഭിച്ചു. അന്വേഷണം പുരോഗമിക്കുന്നതിനനുസരിച്ച് കൂടുതൽ ജീവനക്കാരെ പോലീസ് ചോദ്യം ചെയ്യുമെന്ന് വൃത്തങ്ങൾ കൂട്ടിച്ചേർത്തു.

ആനന്ദ ബോസ് പീഡിപ്പിച്ചുവെന്നാരോപിച്ച് ഒരു വനിതാ കരാർ ജീവനക്കാരി ഹെയർ സ്ട്രീറ്റ് പോലീസ് സ്റ്റേഷനിൽ പോലീസിൽ പരാതി നൽകിയതിന് തൊട്ടുപിന്നാലെയാണ് പോലീസ് നടപടി. മുഖ്യമന്ത്രി മമത ബാനർജി ഉൾപ്പെടെയുള്ള തൃണമൂൽ കോൺഗ്രസിൻ്റെ നിരവധി നേതാക്കൾ സംഭവം ഭയാനകമാണെന്ന് അപലപിച്ചു.

പരാതിക്കാരിക്ക് കൊൽക്കത്ത പോലീസും സുരക്ഷ ഒരുക്കിയിട്ടുണ്ട്. ഇത്തരം കൂടുതൽ ആരോപണങ്ങൾ ഇനിയും വരാനിരിക്കുന്നതായി പ്രതീക്ഷിക്കുന്നതായി ആരോപണങ്ങളോട് പ്രതികരിച്ച ഗവർണർ ആനന്ദ ബോസ് പറഞ്ഞു.

അഴിമതി തുറന്നുകാട്ടാനും അക്രമം തടയാനുമുള്ള നിശ്ചയദാർഢ്യത്തോടെയുള്ള ശ്രമങ്ങളിൽ നിന്ന് തന്നെ പിന്തിരിപ്പിക്കാൻ ആർക്കും കഴിയില്ലെന്ന് ഗവർണർ പ്രതികരിച്ചു.