ഗുരുഗ്രാം: ഭാര്യ സഹോദരനെ വിവാഹം ചെയ്തതറിഞ്ഞ് അവരുടെ 7 മാസം പ്രായമായ കുഞ്ഞിനെ കൊലപ്പെടുത്തിയ യുവാവ് അറസ്റ്റിൽ. ഹരിയാനയിലെ ഗുരുഗ്രാമിലാണ് സംഭവം. പ്രതിയായ ബീഹാർ സ്വദേശി വിജയ് സഹായിയെ (30 ) പൊലീസ് അറസ്റ്റ് ചെയ്തു. കുഞ്ഞിനെ കൊലപ്പെടുത്തി മണിക്കൂറുകൾക്കുള്ളിൽ തന്നെ പൊലീസ് പ്രതിയെ പിടികൂടുകയായിരുന്നു.
വിജയ് മാലമോഷണക്കേസിൽ അറസ്റ്റിലായി കഴിഞ്ഞ നാല് വർഷമായി ജയിലിൽ കഴിയുകയായിരുന്നു. ഈ സമയത്ത് ഭാര്യ ഇയാളുടെ ഇളയ സഹോദരനെ വിവാഹം കഴിക്കുകയായിരുന്നു. പിന്നീട് ഇവർക്കൊരു പെൺകുഞ്ഞും ജനിച്ചു. ഏപ്രിൽ 24 ന് ജയിലിൽ നിന്നും പുറത്തിറങ്ങിയപ്പോഴാണ് ഭാര്യ സഹോദരനെ വിവാഹം ചെയ്ത വിവരം ഇയാൾ അറിയുന്നത്. ഇതിൽ രോഷാകുലനായ പ്രതി വേർപിരിഞ്ഞ ഭാര്യയുമായി വഴക്കിടുകയും ചെയ്തു. ഭാര്യയോടുള്ള ദേഷ്യത്തിൽ ഇവരുടെ 7 മാസം പ്രായമുള്ള കുഞ്ഞിനെ ഇയാൾ നിലത്തെറിഞ്ഞു കൊന്ന ശേഷം ഓടി രക്ഷപ്പെടുകയായിരുന്നു.
നാതുപുര ഗ്രാമപ്രദേശത്ത് പെൺകുഞ്ഞിനെ അബോധാവസ്ഥയിൽ കണ്ടതായുള്ള വിവരത്തിന്റെ അടിസ്ഥാനത്തിൽ പിറ്റേന്ന് രാവിലെ പൊലീസ് സ്ഥലത്തെത്തി മൃതദേഹം കണ്ടെത്തി. പോസ്റ്റ്മോർട്ടം നടപടികൾക്കായി കുഞ്ഞിന്റെ മൃതദേഹം ആശുപത്രിയിലേക്ക് മാറ്റി. സംഭവത്തിൽ അന്വേഷണം പുരോഗമിക്കുകയാണ്.